Esin Hakaj është në qendër të vëmendjes në këtë merkato vere, pasi ka në tavolinë plot tri oferta. Ekipi i Samsunsporit në Turqi ka shfaqur interes për anësorin e majtë, por dhe skuadra e Vllaznisë, që i ka bërë ofertë konkrete 24- vjeçarit.
Megjithatë, Hakaj ka pritur drejtuesit e Partizanit për të biseduar për rinovimin, ku ka vendosur edhe kushtin e tij: pagë 6 mijë euro në muaj. Duket se drejtuesit e Partizanit kanë rënë dakord me mbrojtësin e majtë dhe Hakaj, me shumë gjasa do të qëndrojë te Partizani edhe për sezonin tjetër.
Deri më tani, skuadra e Partizanit ka bërë tri afrime zyrtare. Dajan Shehi, Herald Marku dhe Emiljano Musta kanë firmosur për të kuqtë dhe priten të jenë titullarë për edicionin e ardhshëm, duke përforcuar tepër ekipin. Por, nga ana tjetër, ka pasur dhe disa largime të rëndësishme, siç ishin Asani dhe Çinari.
Largimi i këtyre dy lojtarëve ka lënë boshllëk në krahët e sulmit dhe pikërisht në këto pozicione, Partizani pritet të ndërhyjë. Objektivat e drejtuesve janë të marrin dy sulmues krahu, që mund të alternohen dhe të bëjnë të gjithë repartin ofensiv, së bashku me Stenio Zhuniorin. Aktualisht, vetëm Tedi Cara është lojtar natyral i këtij roli.
