Zbulohen 300 kg kokainë në Portin e Durrësit, arrestohet 1 person/ Detajet

Një sasi prej 300 kg lëndë narkotike, e dyshuar si kokainë, u zbulua sot në Portin e Durrësit, ndërsa u arrestua në kushtet e flagrancës drejtuesi i kamionit, ku ishte fshehur droga.

Sasia rekord e lëndës narkotike ishte fshehur në një kamion me targa të Maqedonisë së Veriut, që po kalonte transit drejt Italisë.

Autoritetet shqiptare theksojnë se në bazë të dyshimeve të krijuara vendosën që kamionin ta fusnin për kontroll të detajuar në vijën e dytë, ku u zbulua droga. Kamioni drejtohej nga një 40-vjeçar me inicialet Nazif Ajroski nga Maqedonia e Veriut, i cili u arrestua.

Sikur duket edhe në foton e publikuar nga policia e shtetit, kokaina ishte e paketuar me logot e “Chicago Bulls”, “Dior” dhe ekipit të PSG-së.

“Si rezultat i kontrollit të imtësishëm të ushtruar në kamionin që drejtohej nga një shtetas nga Maqedonia e Veriut, Task Forca gjeti të fshehur në trupin e kamionit, një sasi rreth 300 kilogramë lëndë narkotike të dyshuar kokainë, e cila u sekuestrua në cilësinë e provës materiale”, thuhet në njoftimin zyrtar të policisë.

Në vijim të veprimeve, nga specialistët për Hetimin e Narkotikëve në Drejtorinë Vendore të Policisë Durrës u arrestua në flagrancë drejtuesi i kamionit, shtetasi N. A., 40 vjeç, banues në Maqedoninë e Veriut..

LEXO EDHE  Plagosi dy shokët për një gërvishtje makine, e shkuara e errët e Aldo Gjinit

Grupi hetimor, nën drejtimin e Prokurorisë së Rrethit Gjyqësor Durrës vijon veprimet hetimore për dokumentimin e plotë kësaj veprimtarie kriminale, identifikimin dhe kapjen e personave të tjerë të përfshirë në të.

Kamioni ka hyrë nga pika kufitare e Qafë Thanës dhe nesër do nisej për në Itali, ku destinacionin e kishte në Napoli.

Mësohet se itinerari i kamionit ishte: Belgjikë-Serbi-RMV-Shqipëri.

Kamioni ka qenë i ngarkuar me hekur dhe kokaina ishte e fshehur në trupin e kamionit. Nga dëshmia e drejtuesit të kamionit, mësohet se ai ka deklaruar para policisë se nuk ka pasur dijeni për sasinë e drogës, ndërsa transportonte materiale ndërtimi.

Në muajt e fundit në portin e Durrësit janë kapur apo zbuluar sasi të ndryshme lënde narkotike, kryesisht që vinte nga Amerika Latine apo ajo Qendrore, hynte në Shqipëri dhe kishte si destinacion vendet e BE-së. Rasti më i fundit ishte zbulimi i rreth 400 kg lëndë narkotike, e cila pasi kaloi territorin shqiptar u kap në Kosovë, në kuadrin e një operacioni të përbashkët mes autoriteve shqiptare, kosovare dhe DEA-s amerikane, e cila njoftoi mbi sasinë e lëndës narkotike.