Kolegji i Posaçëm i Apelimit njoftoi këtë të Premte shkarkimin nga detyra të kryetarit të Gjykatës së Apelit Administrativ, Kastriot Selita.
Në vitin 2019, Kastriot Selita u konfirmua nga KPK, vendim ky që u apelua nga Komisioneri Publik dhe çështja kaloi për shqyrtim në shkallën e dytë te vetingut.
Komisioneri Publik Florjan Ballhysa vuri në pah mos justifikimin e jë pjese të pasurisë nga Selita me burime të ligjshme. Ballhysa përmendi probleme në këtë kuadër me një banesë 124.9 m2 në Tiranë, një apartamenti Duplex dhe trualli në Lalëz të Durrësit. Gjithashtu, Komisioneri konstatoi se nuk ishte arritur të provohej përfitimi i të ardhurave të bashkëshortes nga një fondacion për vitet 2002 – 2003, si dhe ligjshmëria e tyre për gjithë periudhën tjetër.
Kryetari i Gjykatës Administrative të Apelit u përball edhe me dy denoncime gjatë procesit të vettingut. Ai u akuzua nga një grup gjyqtarësh të Apelit për dy nga tre kriteret rivlerësuese, profesionalizmi dhe pastërtia e figurës. Komisioni i Pavarur i Kualifikimit relatoi pretendimin e ngritur nga ky grup gjyqtarësh se në vitin 2016 një trupë gjykuese me Selitën në përbërje, ka marrë një vendim në tejkalim të ligjit. Sipas denoncuesve, verdikti në fjalë ka detyruar Këshillin e Lartë të Prokurorisë të emërojë si prokuror Bledar Valikajn, një vit pasi dekretimi i tij ishte rrëzuar me heshtje nga Presidenti i Republikës. Në denoncimin tjetër pretendohej se gjyqtari Selita kishte kontakte me një shtetas të përfshirë në veprimtari kriminale, pretendim që, sipas KPK-së rezultonte i paprovuar.
Selita i kundërshtoi edhe konkluzionet e Komisionerit dhe kërkoi lënien në fuqi të vendimit të KPK. Por, në fund, KPA vendosi shkarkimin e tij nga detyra.
Lexo edhe:
Veting i dalë boje/ Konfirmohet Kastriot Selita, bëri prokuror burrin e Ermonelës
