Veting i dalë boje/ Konfirmohet Kastriot Selita, bëri prokuror burrin e Ermonelës

Nga Boldnews.al

Komisioni i Pavarur i Kualifikimit (KPK) konfirmoi në detyrë kryetarin e Gjykatës së Apelit Administrativ, Kastriot Selita, duke shënuar rastin e radhës së favorizimit të subjekteve që i kanë shërbyer më së miri qeveritarëve të lartë socialistë.

Selita drejtoi trupën gjykuese, e cila, në vitin 2016, vendosi të detyronte Presidentin e Republikës për të emëruar prokuror Bledar Valikaj, burrin e deputetes socialiste, Ermonela Felaj.

KPK vendosi që Selita të vijojë karrierën e gjyqtarit, duke rrëzuar një e nga një rreth 17 denoncime për vendimmarrje të dyshimta të Selitës, si edhe pikëpyetje të mëdha mbi pasurinë e tij.

Kastriot Selita ishte pjesë e listës prioritare të Vetingut. Shorti ndaj tij u hodh në Dhjetor të vitit 2017, pasi ai u shortua si anëtar i Këshillit të parë të Emërimeve në Drejtësi.

Por, ndërkohë që jo vetëm subjektet e listës prioritare, por edhe shumë të tjerë kanë përfunduar dy fazat e Vetingut, Komisioni i Pavarur i Kualifikimit e vonoi për 16 muaj procesin ndaj tij.

Në përfundim, KPK konstatoi se gjyqtari Kastriot Selita përmbush kushtet për të vijuar detyrën e tij.

KPK, gjatë verifikimit të tij, rrëzoi, ndër të tjera, edhe një denoncim që ishte dorëzuar ndaj Selitën nga një grup kolegësh të tij gjyqtarë për vendimin, në bazë të të cilit Bledar Valikaj u emërua prokuror.

LEXO EDHE  Rama i dha Kopshtin Botanik Veliajt, reagojnë fort pedagogët e Shkencave të Natyrës/ Tërhiqu ose…

Gjyqtari Kastriot Selita, ndër të tjera, ka qenë kryetar i trupës gjykuese, e cila në vitin 2016 vendosi që të urdhërojë Presidentin e Republikës për të emëruar “prokuror” shtetasin Bledar Valikaj, bashkëshorti i deputetes së Partisë Socialiste, Ermonela Felaj.

Bledar Valikaj, oficer i Policisë Gjyqësore, konkuroi për t’u emëruar në vitin 2015, në një konkurs të zhvilluar nga Prokurori i Përgjithshëm, bazuar në ligjin e asaj kohe.

Në përfundim të konkursit, Prokurori i Përgjithshëm i asaj kohe, Adriatik Llalla, i dërgoi për dekretim Presidentit të Republikës, Bujar Nishani, emrat e fituesve të konkursit, përfshirë edhe Bledar Valikajn.

Presidenti Nishani, bazuar në tagrat e tij kushtetues, nuk u shpreh për dekretimin e kandidaturës së Bledar Valikaj brenda 30 ditëve, duke e refuzuar në heshtje emërimin e tij si prokuror.

Valikaj, bashkëshort i deputetes Ermonela Felaj, i drejtohet Gjykatës Administrative, në të cilën kërkon që Presidenti të shprehet dhe të nënshkruajë dekretimin e tij si prokuror.

Me vendimin e datës 6 Shkurt 2019, trupa gjykuese e Apelit Administrativ, e drejtuar nga Kastriot Selita, vendosi përfundimisht që të urdhërojë Presidentin për të emëruar bashkëshortin e Ermonela Felaj në detyrën e prokurorit.