Marrëveshja e firmosur në prani të Trump, Qeveria Kurti: Nuk ka ligjshmëri

Ambasadori i Shteteve të Bashkuara të Amerikës në Kosovë, Philip Kosnett, në një intervistë për Radio Televizionin 21, në fillim të muajit maj, u shpreh se Administrata e Presidentit Joe Biden zyrtarisht ka konstatuar se Marrëveshja e Washingtonit duhet të jetë baza për bashkëpunimin e mëtejshëm. Kosnett gjithashtu u shpreh se Kosova dhe Serbia duhet t’iu përmbahen zotimeve të tyre dhe të punojnë së bashku për mbarëvajtjen e Marrëveshjes.

“Administrata e Biden-it ka konstatuar edhe zyrtarisht që Marrëveshjet e Washingtonit duhet të jenë bazë për punën tonë përpara. Ne besojmë se Kosova dhe Serbia duhet t’u përmbahen këtyre zotimeve dhe të punojnë së bashku”, u shpreh Kosnett.

Pavarësisht kësaj deklarate të Kosnett, zëdhënësi i Qeverisë së Kosovës, Perparim Kryeziu në një intervistë për Ekonomia Online, është shprehur se Marrëveshja e Washingtonit nuk ka ligjshmëri në Kosovë.

LEXO EDHE  Policia në ndjekje të grabitësve shqiptarë në Mykons, plagoset një nga efektivët

“Për ta përsëritur një qëndrim të kamotshëm të kryeministrit Kurti më duhet të them se së pari ai dokument nuk e ka vlerën dhe natyrën juridike të një marrëveshjeje për shkak se asnjë nuk është sjellë në Kuvend as për t’u diskutuar as për ta marrë mbështetjen e Kuvendit dhe si i tillë me të drejtë është quajtur si dokument me zotime të njëanshme të një Qeverie e cila në kohën e nënshkrimit të këtij dokumenti ishte pa legjitimitet dhe më pastaj në ndërkohë u pat vërtetuar se nuk gëzon ligjshmërinë e nevojshme për të qenë në Qeveri. Përtej asaj ne jemi në kontakt me ShBA-në për të punuar së bashku për temat të cilat kanë interes të përbashkët” ,tha Kryeziu.