Rafael Nadal ka deklaruar se nuk do të marrë pjesë në Wimbledon dhe në Olimpiadën e Tokios. Në një deklaratë të publikuar në llogarinë e tij në Twitter, fituesi i 20 turneve Grand Slam tha: “Asnjëherë nuk është vendim i lehtë për t’u marrë, por pasi dëgjova trupin tim dhe e diskutova me skuadrën, kuptova se ishte vendimi i duhur”.
“Synimi është që të zgjas karrierën time dhe të vijoj të bëj atë që më lumturon, që është të garoj në nivelet më të larta për të arritur objektivat që kam. Fakti që mes dy turneve (Roland Garros dhe Wimbledon) kishte vetëm 2 javë kohë, nuk mi bëri gjërat më të lehta”.
Ndeshja e fundit e Nadal ishte gjysmëfinalja e Roland Garros, ku u mund nga Novak Djokovic, i cili më pas fitoi edhe turneun. Wimbledon do të zhvillohet më 28 qershor deri më 11 korrik, ndërsa Olimpiada e Tokios nga 23 korriku deri më 8 gusht.