Greqia është bërë vendi i tretë i BE-së që siguron miratimin e Komisionit Evropian për një plan rimëkëmbjeje që do të financohet nga fondi i shpëtimit prej koronavirusit të BE-së.
AFP raporton se shefja e Komisionit Evropian Ursula von der Leyen e bëri njoftimin në ndalesën e tretë të një turneu evropian për të vënë në dukje miratimin nga BE për projektet e paraqitura nga vendet që kanë pasur pasoja të mëdha ekonomike nga pandemia.
Financimi do të vijë nga një fond i paprecedent prej 750 miliardë eurosh i BE që do të emetojë bono të përbashkëta për herë të parë.
Athina do të marrë 17.8 miliardë euro në grante të drejtpërdrejta dhe 12.7 miliardë në kredi.
“Miratimi ynë sot është një moment i rëndësishëm për disbursimin e 30.5 miliardë eurove gjatë viteve të ardhshme,” tha Von der Leyen pas takimit me kryeministrin grek Kyriakos Mitsotakis në Agora.
“Sapo plani të miratohet nga Këshilli Evropian ne do të jemi gati të shpërndajmë fondet e para në korrik,” shtoi ajo duke iu referuar organit të BE të përbërë nga krerë shtetesh ose qeverish.
Plani stimulues grek “përfaqëson një sfidë por edhe një mundësi të madhe, të madhe,” tha von der Leyen. “E mira e sotme është që Evropa dhe Greqia janë së bashku në këtë përpjekje.”
