Edith Harxhi, e cila kandidoi për kryetare të PD, ka reaguar në rrjetet sociale, pak orë pas shpalljes së rezultateve zyrtare, ku ajo ka marrë disa qindra vota, në të gjithë vendin.
E mbështetur nga grupimi “Për PD”, Harxhi ka shprehur falënderimet për të gjithë demokratët që e votuan. Gjithashtu ajo thekson se së shpejti do të thotë edhe mendimet e saj mbështetur mbi fakte për procesin.
“Të nderuar miq, anëtarë dhe mbështetës të Partisë Demokratike, ju shpreh gjithë mirënjohjen time për kohën dhe vëmendjen që më keni kushtuar. Gjatë këtyre dy javëve pata nderin dhe kënaqësinë t’ju takoja, të bisedonim dhe të bashkëndanim shqetësimet tona për gjendjen e vështirë në të cilën ndodhen partia jonë dhe Shqipëria.
Natyrisht koha ishte mjaft e kufizuar dhe e pamjaftueshme. Por është vetëm fillimi. Sepse, si ju kam premtuar, unë do vij t’ju takoj përsëri dhe së bashku do gjejmë zgjidhjet më të mira për t’i rikthyer Partisë Demokratike vlerat, dinjitetin, forcën dhe rëndësinë e humbur, për t’a ribërë atë përsëri një Parti qeverisëse.
Lidhur me atë që ndodhi dje, gjatë procesit zgjedhor, së shpejti do them mendimet e mija, mbështetur mbi fakte. Por, natyrisht, gjithçka ndodhi dje nuk do pengojë dhe, aq më pak, t’a ndalojë këtë mision tonë të përbashkët.
Duke ju shprehur përsëri gjithë mirënjohjen dhe nderimin tim, pres me kënaqësi të ritakohemi së shpejti. Me respekt, E.H,” shkruan Harxhi.
