Partia Demokratike zyrtarizon fitoren e Lulzim Bashës në zgjedhjet për kryetar brenda kësaj force politike, të zhvilluara një ditë më parë.
Jemin Gjana, kryetari i Komisionit të Zgjedhjeve në PD, tha se Basha mori 32 882 vota, me një diference më shumë se 20 000 vota ndaj ndjekësit më të afërt.
“Komisioni Zgjedhor i Partisë Demokratike sapo ka përmbyllur procesverbalin e përgatitjes dhe të deklarimit të rezultatit përfundimtar zyrtar. Kemi administruar 76 kutitë e 76 komisioneve të votimit në të gjithë vendin. Në prani të Komsionit janë hapur një nga një kutitë, janë regjistruar të dhënat e dokumentuar në procesverbale. Nga procesverbalet e administruara në kuti rezulton që në të gjitha rastet komisionerët, natyrisht kanë firmosur dhe përfaqësuesit e kandidatëve në garë në të gjithë ato raste ku kandidatët kanë patur përfaqësim”, tha Gjana.
Bazuar në të dhënave zyrtare të 76 procesverbaleve të futura në llogaritje, të drejtë vote kanë pasur 75 067 anëtarë të PD, nga të cilët 41 097 kanë votuar, sqaroi Gjana.
Ai tha se vota të pavlefshme rezultuan 413, ndërsa të vlefshme 40 684 vota.
Të ndara sipas kandidatëve, Kadillin e votuan 781 anëtarë, Harxhi mori 983, Shehaj – 6 038 dhe Basha 32 882.
“Bazuar në këto të dhëna komisioni zgjedhor i PD shpall zyrtarisht fitues të garës për kryetar të PD zotin Lulzim Basha”, përfundoi Gjana.
Kështu, Basha do vijojë të jetë në krye të Partisë Demokratike.
