Bujar Nishani, kreu i Këshillit Kombëtar të PD, u shpreh në emisionin “Raw Politics” në Euronews, se rezultati i shpallur zyrtarisht ishte mëse i pritur.
Nishani foli për një garë të pabarabartë, me kufizime për sfidantët e Lulzim Bashës, madje as gazeta zyrtare e PD, Rilindja Demokratike, nuk pasqyroi qoftë edhe një takim të vetëm të 3 kandidatëve.
Nishani u pyet sepse hynë në garë, ndërsa tha se “përtej garës formale, ne duhet të kuptojmë se çfarë ka përfituar opinioni publik nga ky proces”.
“Kjo ishte një maskaradë zgjedhore. Nuk ishte vetëm ditën e djeshme, por gjatë gjithë procesit. Nisi me një mbledhje urgjente të Këshillit Kombëtar, nuk u la as diskutimi as debati, madje KK i PD nuk e miratoi datën e mbajtjes së zgjedhjeve, pasi atë e kishte vendosur Kryesia”, tha Nishani.
Ai u shpreh se ka argumente dhe fakte që provojnë se procesi zgjedhor në PD ishte maskaradë, që nisi me kohën që iu la në dispozicion kandidatëve, e gjithë infrastruktura financiare dhe burimet njerëzore, ishte në funksion vetëm të Lulzim Bashës.
“Kryetari i degës së Kavajës nuk pranonte të organizonte as takimet e kandidatëve të tjerë, nuk na vinin në dispozicion as zyrat e PD, nuk u njoftuan as anëtarët për takimet tona”, tha Nishani.
Ai shtoi se në Qarkun e Korçës, në Bashkinë Korçë, Basha mori 17 % të votave të anëtarësisë, ndërsa në Bashkitë e tjera të këtij Qarku mori 70 % të votave.
“Pse ndodhi kjo? Sepse në Korçë procesi u monitorua nga të gjithë kandidatët, ndërsa në bashkitë e tjera, nuk pati asnjë vëzhgues nga kandidatët e tjerë”, tha Nishani, duke shtuar se “Lulzim Basha nuk ka legjitimitetin për të qenë Kryetar, pasi përfaqëson vetëm 30 % të anëtarësisë”.
Nishani tha se nga listat e anëtarësisë janë hequr emrat e anëtarëve që mendoheshin se do të votonin kundër Bashës, madje janë hequr edhe kryetarët e seksioneve.
“Lulzim Basha ka marrë më pak vota se në 2017, rreth 40 % më pak vota, përveç faktit se në mënyrë të turpshme u manipuluan listat e anëtarëve”, tha Nishani. Sipas tij, vetë Basha ka deklaruar disa muaj më parë se PD ka 116 mijë anëtarë, ndërkohë që listat e fundit rezultuan rreth 75 mijë anëtarë.
