Deri në orën 10:30, referuar shifrave zyrtare të PD-së, kanë marrë pjesë në votime 17.2 % e anëtarëve. Kreu i KQZ pranë PD, Jemin Gjana, tha se kanë votuar mbi 12900 anëtarë me të drejtë vote.
Gjana ka hedhur poshtë pretendimet e kandidatit Agron Shehaj lidhur me përjashtimin e vëzhguesve në disa nga degët e PD-së.
Sipas Gjanës, probleme ka pasur në 7-8 raste lidhur me përfaqësuesit e kandidatit Shehaj, për shkak se iu rrëzuan emrat e kandidatëve, për shkak se ose nuk kishin kartë anëtarësie, ose janë emra që janë deleguar nga një degë tjetër.
“Nuk është pranuar që një anëtar i një dege tjetër të shkojë si vëzhgues në një tjetër degë, kjo bazuar në rregullat e vendosura”, tha Gjana.
Sipas tij, vëzhguesja e Shehajt në njësinë nr 5 u përjashtua nga procesi, pasi ajo ka shkelur udhëzimin e datës 8 qershor, ku përcaktohet se nuk lejohet filmimi, fotografimi, i fletës së votimit apo listës së anëtarëve.
Gjithashtu Gjana tha se në Shkodër ka pasur një problem po me vëzhguesit e kandidatit Shehaj, ku njëri vëlla, i cili nuk është anëtar i PD, ka shkuar si vëzhgues në emër të vëllait tjetër, i cili është anëtar i PD.
“Ne nuk kemi pranuar që vëzhguesi i Shehajt që është anëtar i njësisë nr 5 të shkojë si vëzhgues te njesia 2, apo që një anëtar i PD në Rrogozhinë të vëzhgojë procesin në Kavajë, apo një anëtar i degës së PD në Korçë të shkojë si vëzhgues në Maliq”, tha Gjana.
