Nga Boldnews.al
Tenderat pa garë dhe të fituara nga oferta shumë pranë fondit limit janë shndërruar në një “rutinë”, sidomos në procedurat që janë mbi 1 milion euro, duke shkaktuar shpërdorim kolosal të fondeve publike dhe taksave të qytetarëve.
Së fundmi, Ujësjellësi i Vlorës ka shpallur rezultatet e tenderit për “Ndërtimin e Rrjetit të Kanaleve të Ujërave të Zeza”, me fond limit 274. 779 449 lekë të reja pa TVSH, ose rreth 2.2 milionë euro.
Bazuar në dokumentat zyrtarë, rezulton se në procedurë tenderuese ka marrë pjesë vetëm kompania “Gener 2”, në pronësi të biznesmenit Bashkim Ulaj.
Pjesëmarrësi i vetëm në tender ka paraqitur ofertën në vlerën 273.421.937 lekë të reja pa TVSH, ose rreth 99.5 përqind e fondit limit.
Në foto: Njoftimi për shpalljen e fituesit të tenderit 2.2 milionë euro
Formalisht, tenderi duket në rregull, pasi procedura ka qenë e hapur dhe kompanitë e interesuara mund të aplikonin për të ofruar shërbimin e tyre ndaj Ndërmarrjes së Ujësjellës-Kanalizimeve të qytetit të Vlorës.
Megjithatë, përtej “formalitetit”, ekspertët ndërkombëtarë të prokurimeve publike ngrenë “flamurin e kuq” për dyshime mbi procedurat, në rastet kur oferta fituese është shumë pranë fondit limit.
Rasti i tenderit 2.2 milionë euro të Ujësjellësit të Vlorës është pikërisht një prej atyre që, praktika ndërkombëtar, i konsideron me “flamur të kuq”, pasi është një garë pa konkurencë dhe oferta e vetme është pothuajse aq sa autoriteti kontraktor e ka konsideruar si limitin më të lartë të shpenzimeve.
Financimi i projektit për “Ndërtim KUZ, rrjeti tercial (Lidhjet familjare) për UK Vlorë” është miratuar në Dhjetor të vitit 2020 nga Agjencia Kombëtare e Ujësjellës-Kanalizimeve, e drejtuar nga Alqi Bllako, i zgjedhur deputet i Partisë Socialiste në zgjedhjet e përgjithshme të 25 Prillit 2021.
Sipas tabelës së fondit, pagesat për kompaninë fituese do të ndahen në tre vite, përgjatë periudhës 2021-2023.
Qëllimi i përgjithshëm i projektit, siç deklarohet në dokumentat e tenderit, është plotësimi me lidhjen e banesave në sistemin e Kanalizimeve të Ujrave të Zeza të zonës që kufizohet me rrugën transballkanike në perëndim dhe me Pyllin e Sodës në jug, të papërfshira më parë në sistemin e përgjithshëm të qytetit të Vlorës.
Në foto: Pjesë nga dokumentat e tenderit
Objektivi i përgjithshëm i projektit është të përmirësojë kushtet sanitare dhe mjedisore, nëpërmjet sigurimit të shkarkimeve të banesave në sistemin e ri të ndërtuar në këtë zonë nga projekti i financuar nga Komuniteti Europian dhe transportin e tyre në sistemin kryesor dhe më tej në Impiantin e Trajtimit të Ujrave të Zeza.
Ndërkohë që qëllimi dhe objekti i projektit janë hartuar mirë, zhvillimi i procedurës tenderuese duket se çalon tek mungesa e konkurencës dhe oferta e lartë, thuajse sa fondi limit, elementë të cilat prekin në mënyrë të drejtëpërdrejtë buxhetin e qytetarëve.
