Një 52-vjeçar me banim në Cërrik është vënë në pranga në Kakavijë, pasi gjatë kontrollit në mjetin me të cilin lëvizte, u gjetën fishekë brenda një çantë.
Policia njoftoi këtë të Shtunë se, shërbimet e Policisë Kufitare në Kakavijë, bazuar në analizën e riskut, në dalje të RSH-së, kanë kaluar për kontroll në vijën e dytë, mjetin tip “Ford” që drejtohej nga shtetasi I.H., 52 vjeç, banues në Cërrik.
Gjatë kontrollit të ushtruar në automjet, shërbimet e Policisë Kufitare dhe shërbimet e Frontex-it, në bashkëpunim me shërbimet doganore, gjetën 49 fishekë luftarak (të kalibrit 9mm) në një çantë dore.
Në cilësinë e provës materiale u sekuestruan 49 fishekë dhe automjeti.
Në përfundim të veprimeve të para hetimore të kryera nga specialistët e Seksionit të Hetimit të Trafiqeve të Paligjshme dhe Narkotikëve në DVP Gjirokastër, u arrestua në flagrancë shtetasi I.H. për veprën penale “Trafikim i armëve dhe municionit”, njoftoi policia.
