“Derbi” për talentin e Apolonisë, sulmuesi kërkohet në kryeqytet

Një nga lojtarët më të dalluar të Apolonisë në sezonin e fundit ishte pa dyshim Rimal Haxhiu. Sulmuesi është sakrifikuar shpesh (duke dalë nga roli i tij natyral), por sërish ka spikatur. Dhe mundi po shpërblehet. Ai tashmë është kthyer në një nga futbollistët më të çmuar të merkatos.

Trajnerët Orges Shehi dhe Bledi Shkëmbi e pëlqejnë shumë lojën e tij dhe janë vënë në garë për ta bërë të vetin anësorin. Si Tirana, ashtu dhe Dinamo, ditët e fundit kanë shpeshtuar kontaktet me drejtuesit e klubit fierak, duke kërkuar me ngulm krutanin e bardhejeshilëve.

Haxhiu ka një përvojë të konsiderueshme në Superiore, pasi dy sezonet e fundit ka luajtur 40 ndeshje me fanellën e Luftëtarit dhe të Apolonisë. Produkt i akademisë së Partizanit, 22-vjeçari spikati tek Iliria e Fushë-Krujës dhe pastaj te Luftëtari, ku luajti gjysmë sezoni në elitë, para se të mbërrinte tek Apolonia, bashkë me ish-trajnerin e tij në Gjirokastër, Nikolin Çoçlli.