Kadilli: PD e organizuar me skemën e PPSH, ja ç´duhet të bëjmë

Fatbardh Kadilli, kandidat për kreun e PD, tha se kjo parti vijon të organizohet si skemat e PPSH-së. Kadilli tha se do të hapë partinë duke zgjeruar strukturat e saj.

“Edi Rama do të jetë ai që është, por ne duhet të modelojmë PD-në, duhet që partia të jetë më e madhe se Kryetari. Çdo kandidat për kryebashkiak apo deputet, çdo kryetar dege apo ZAZ duhet të zgjidhet nga anëtarësia. Ne s´mund të mbajmë organizimin aktual të ngjashëm me atë të PPSH-së.

Ne duhet të ndryshojmë vetveten, anëtarësia duhet të marrë peshën që i takon, s´mund të vazhdohet më që vendimet i merr dhe i firmos Luli apo Bardhi.

PD duhet të ndryshojë rrënjësisht lidhjet me qytetarin. Kjo parti u krijua nga sheshet dhe këtë do të kthej unë, mobilizimin e anëtarëve të kësaj partie”, tha Kadilli.

Ai u shpreh se prej 30 vitesh është pjesë e PD, dhe rezultatet që ka arritur në Qarkun e Beratit si drejtues qarku apo në Pogradec janë rekord krahasuar me çdo rezultat tjetër që kjo parti ka marrë.

“Në 1991, PPSH kishte 180 mijë anëtarë, pa përfshirë ato 200 apo 300 mijë të tjerë që kishte në aparatin e saj, dhe PD e mundi, e mundi ajo PD që lindi nga studentët. Këtë po kërkoj edhe unë, krijimin e frymës”, tha Kadilli.