Një aksident i rëndë ndodhi mbrëmjen e së enjtes në rrugën Xhanfize Keko në Tiranë, ku një automjet luksoz, aksidentoi një 23-vjeçare, të cilës i këputi këmbën.
Aksidenti ndodhi rreth orës 19:15, ku makina luksoz për shkak të shpejtësisë doli nga rruga dhe përplasi fillimisht bordurat anësore të rrugës për të kaluar në trotuar duke marrë përpara vajzën 23 vjeçe.
Nga përplasja vajza humbi njërën këmbë dhe ndodhet në gjendje të rëndë në spital, ndërsa adoleshenti u shoqërua në komisariat.
Drejtues i automjetit që shkaktoi aksidenti ishte 19 vjeçari Jehon Breçani, djali i ish-drejtuesit të policisë së Tiranës Erzen Breçani.
Në momentin e aksidentit, 23-vjeçarja, e cila është transportuar në spital, në gjendje të rëndë shëndetësore, ishte duke ecur në trotuar.
Nga rrjetet sociale, duket se adoleshenti ekspozon pasionin për makinat luksoze. Madje “Story”-n e fundit në timon me “Benz”-in luksoz AA 888 XX e kishte postuar pak orë përpara se të ndodhte aksidenti i rëndë.
Përpos “Benz”-it me të cilin shkaktoi aksidentin, 19-vjeçari shfaqet në foto edhe me makina të tjera “Jeep” dhe “BMW” me puro.
