FOTO/ Dikur i përulej, sot e thumbon. Si ndryshuan raportet e Lali Erit me Metën

Erion Veliaj mori mandatin e parë si Kryebashkiak i Tiranës edhe me ndihmën e Ilir Metës dhe LSI-së, që ishin në koalicion me socialistët në 2015, kohë kur u zhvilluan zgjedhjet vendore. Katër vjet më pas, Veliaj u rikonfirmua si Kryebashkiak, në një garë moniste votimesh, pa kandidatë të tjerë, pasi opozita bojkotoi procesin.

Për 4 vitet e para si Kryebashkiak, por edhe më pas, LSI, partia e Presidentit Ilir Meta, u kujdes që të përjashtonte nga akuzat dhe sulmet Erion Veliajn, pavarësisht shpërbërjes së koalicionit me socialistët. Madje vështirë që deri në muajt e fundit të gjendet deklarata nga zyrtarë të kësaj partie kundër Lali Erit, që trajtohej si i përkëdheluri i LSI dhe shumë prej drejtuesve të kësaj partie.

Vetë Lali kujdesej që në shumë raste të shfaqej dashamirës ndaj Ilir Metës, madje në një nga fotot që qarkulloi me shpejtësi në rrjet, Kryebashkiaku shfaqej i përkulur përpara Presidentit, një moment ky që vështirë ta gjesh edhe kur janë takuar kokat e politikë botërore.

Shumë kollaj gjendet edhe shumë pamje të tjera që tregojnë momentet kur Lali Eri qëndronte para Metës si një çirak, por duket se zhvillimet e fundit politike, kanë bërë që edhe Kryebashkiaku të harrojë këto momente dhe të shfaqet agresiv.

Së fundmi, Kryebashkiaku ka shfrytëzuar një takim me dy ish-presidentët, Alfred Moisiu dhe Bamir Topi, duke dhënë edhe një mesazh kundra Metës.

“Nëse veprimet e tua frymëzojnë të tjerët për të ëndërruar, mësuar dhe punuar më shumë, atëherë ti je lider.” ~John Adams

Kënaqësi gjithmonë takimi me dy presidentët qytetarë e frymëzues Alfred Moisiu dhe Bamir Topi – Shqipëria e njerëzve të mirë!”, shkruan Veliaj.

Foto e publikuar nga Lali Eri vjen një ditë pasi Kuvendi me 104 votat e Rilindjes dhe opozitës së emëruar vendosi shkarkimin e Ilir Metës nga posti i Presidentit. Nuk dihet nëse Veliaj zgjodhi të përdorë dy ish-Presidentë për të dhënë mesazhin kundër Metës, apo dy ish-Krerët e Shtetit, të propozuar nga PD në postet më të larta, vijojnë të tregojnë përulësinë e tyre, ndaj Rilindjes, duke zgjedhur si përfaqësues Lali Erin.

Në fakt, mënyra si Kryebashkiaku vepron, ku fillimisht shfaqet i përulur dhe më pas të sulmon, nuk është garanci për asnjë nga ata që sot mund të shfaqen në krah të tij dhe nesër mund sulmohen po prej tij.

Dhe kjo është çështje karakteri, që ndoshta s´ka lidhje me politikën.