Këshilli i Lartë i Gjyqësorit ka reaguar ndaj deklaratave të ministrit të Brendshëm, Bledi Çuçi, i cili një ditë më parë shprehu kritika për gjyqtarin Elidon Papazisi. Sipas Çuçit, gjyqtari në fjalë me vendimet e tij, po pengon operacionin e IKMT pvr shembjen e ndërtimeve pa leje.
Por, në një reagim zyrtar, KLGJ ngre shqetësimin se deklaratat e bërë nga persona publikë, nuk po respektojnë pavarësinë e magjistratëve për marrjen e vendimeve. Sipas KLGJ, reagime të tilla publike mund të ndikojnë negativisht në procese duke u cënuar figurën togave të zeza.
Gjithsesi KLGJ apelon se në rast evidentimi të shkeljeve, institucionet apo individët t’i drejtohen vetëm një institucioni, Inspektoriatit të Lartë të Drejtësisë.
“Dhënia e drejtësisë duhet të jetë e çliruar nga çdo lloj ndikimi, ndërhyrjeje të subjekteve publike ose private. Ky është kusht i domosdoshëm për garantimin e shtetit të së drejtës.
Qëndrime të tilla nuk bëjnë gjë tjetër, veçse nxisin në publik ndjenjën e armiqësisë ndaj pushtetit gjyqësor, krijojnë imazhin e gabuar mbi gjyqësorin dhe bien ndesh me qëllimet dhe objektivat e reformës në drejtësi, si dhe cenojnë rëndë figurën dhe dinjitetin e gjyqtarit.
Gjithashtu, ato ndikojnë negativisht në ushtrimin e detyrës nga gjyqtarët, për t’i detyruar ata të japin vendime në kundërshtim me parimet e pavarësisë dhe paanësisë, të papranueshme në shtetin e së drejtës, në të cilin mjeti ligjor për të kundërshtuar një vendim gjyqësor është ankimi në një gjykatë më të lartë, sipas legjislacionit në fuqi, jo përbaltja e gjykatës, apo e gjyqtarit.
Po ashtu, kushdo që vjen në dijeni të një veprimtarie apo sjelljeje të gjyqtarit që mund të përbëjë shkelje disiplinore sipas ligjit, ka mundësinë që rastin t’ia referojë Inspektorit të Lartë të Drejtësisë, për të vlerësuar dhe vendosur nëse është vendi për fillimin e procedimit disiplinor të gjyqtarit,”-thuhet ndër të tjera në deklaratën e KLGJ-së.
