Ngjarjet kriminale, Ardi Veliu paralajmëron vartësit: Merrni masa ose do të shkarkoheni

“Mobilizim dhe ndryshime në lidhje me gjendjen e rendit në vend, ose rrokadë të pandalshmne”, ishte ky paralajmërimi i kryepolicit Ardi Veliu ndaj vartësve të tij në Policinë e Shtetit, të cilët i mblodhi në një takim lidhur me situatën e rendit dhe sigurisë në vend.

Takimi nisi rreth orës 11:30 minuta dhe zgjati rreth një orë. Drejtuesit e Policisë së Shtetit nuk preferuan të flisnin para mediave në përfundim të mbledhjes. Mësohet se në takim, është diskutuar për ngjarjet e rënda që kanë ndodhur përgjatë javëve të fundit, përfshirë ato mes grupeve kriminale, por edhe krimet brenda familjes.

Nga raportimet mësohet se Veliu i ka hedhur përgjegjësinë drejtuesve të policisë në qarqe apo shefave të komisariateve, ndërsa ka kërkuar të mbahen në vëzhgim eksponentët kriminal dhe personat me precedent.

Gjatë takimit, Drejtor Veliu ka kërkuar prerë e qartazi, reagim të menjëhershëm të strukturave policore, me qëllim parandalimin e ngjarjeve kriminale, kapjen e personave që qarkullojnë me armë zjarri, që tentojnë të kultivojnë apo trafikojnë lëndë narkotike dhe atyre që kryejë ndërtime pa leje apo krime të tjera mjedisore.

“Të rritet efikasiteti i veprimeve për parandalimin e kultivimit të kanabisit në territor, duke bashkëpunuar me të gjithë aktorët dhe faktorët që ligji i ngarkon me përgjegjësi dhe të ushtrohet kontroll i përditshëm i territorit duke përdorur dronët, si dhe duke marrë të dhënat nga monitorimi ajror i GdF-së.

Strukturat e Policisë në të gjithë vendin, por sidomos në zonat bregdetare, zonat urbane dhe ato të mbrojtura, të veprojnë me tolerancë zero ndaj ndërtimeve pa leje duke proceduar me arrestimin e atyre që kryejnë këto ndërtime.

Qëndrimi i mëtejshëm në detyrë i secilit prej drejtuesve të strukturave vendore do varet nga reagimi i strukturave që keni në menaxhim, nga rezultati i parandalimit të veprimtarisë kriminale në cilëndo fushë që ajo do shfaqet”, tha Veliu.

Kjo mbledhje vjen pas ngjarjeve kriminale, ku atentatet mafioze dhe krimet në familje, kanë tronditur mbarë opinionin publik. NNëntë ditëshin e parë të muajit qershor, kanë ndodhur 8 vrasje.