Mbyllja e komisioneve parlamentare për gazetarët/ Kuvendi: Sallat janë shumë të vogla, s’ka hapësirë

Kuvendi ka reaguar pas vendimit për të përjashuar gazetarët nga pjesëmarrja fizike në mbledhjet e komisioneve Parlamentare.

Sipas Kuvendit, sistemi i ri audio-video që do transmetojë mbledhjet është i rekomanduar dhe i ndërtuar nga Delegacioni i BE-së në Shqipëri, ndërsa thekson se nuk censurohet asnjë pamje dhe transmetimi nuk do të ketë regji qendrore.

“Transmetimi i mbledhjeve të komisioneve, realizohet në kohë reale nëpërmjet këtij sistemi dhe pa asnjë mundësi ndërhyrjeje. Sistemi nuk ka një regji qendrore, por komandohet nga vetë gazetarët, sipas nevojave të tyre. Gazetarët komandojnë sistemin dhe jo sistemi gazetarët”, thuhet në reagim.

Përveç anës teknike, një argument tjetër që përmendet për moslejimin e gazetarëve në ambientet e komisioneve parlamentare, është se “prania e kamerave të shumta në korridoret e Kuvendit dhe komisionet parlamentare krijonte vështirësi për menaxhimin dhe mbarëvajtjen e mbledhjes për shkak të ambienteve shumë të vogla të sallave ku zhvillohen mbledhjet, por edhe kalimi i kabllove, nëpër dritaret e komisioneve gjatë transmetimeve të drejtpërdrejta, ka qenë i vështirë”.

Më tej, argumentohet se edhe në vende të ndryshme të BE-së veprohet në mënyrë të ngjashme. Po ashtu, Kuvendi shton në reagim se edhe pse s’do jenë në mbledhjet e komisioneve, gazetarëve do u lejohet hyrja në ambientet e kryesisë.

Vendimi për moslejimin e gazetarëve në sallat ku zhvillohen mbledhjet parlamentare është cilësuar nga gazetarë dhe shoqata mediash si një formë censure.