Juristi Ledio Braho shprehet se shkarkimi i Metës nga Kuvendi ishte i pritshëm.
Baro theksoi se në Gjykatën Kushtetuese, presidenti duhet të “kapet” edhe me pjesën e procedurës, pasi ka pasur përshpejtime në raport me komisionin hetimor.
“Shkarkimi i Metës ishte i pritshëm, qysh kur u mor në prill nga 49 deputetë, sepse kuvendi qysh me daljen e opozitës, i ka dhënë votat kundrejt PS-së. Këtë gjë e kemi parë edhe në ndryshimin Kushtetutës në mënyrë të njëanshme pa një konsensus. Në ligjin për komisione hetimore, parashikohet se nuk mund të ngrihen komisione hetimore nga Kuvendi 4 muaj para mbarimit të legjislacionit të këtij institucioni. Kështu, kjo datë ishte 9 maji dhe të gjitha procedurat janë përmbyllur deri në 7 maj me përshpejtim. Ajo që mbetet për tu interpretuar është se vendimi është për fillimin e komisionit apo për përfundimin e tij. Kjo bëhet se dihet se në kushte tranzicioni të parlamentit mund të bëhen veprime politike”, tha Braho për Ora News.
“Besoj se në Gjykatën Kushtetuese presidenti duhet të kapet edhe me pjesën e procedurës. Vetë presidenti është njoftuar në datën 4 maj për tu paraqitur në komision dhe ka kërkuar që të jetë i pranishëm në datën 10 maj për shkak të axhendave që ka pasur. Ndërkohë që ky komision e dinte se kjo datë është tej afat 4 muaj, ka ndërmarrë një procedurë të përshpejtuar, duke cenuar edhe besueshmërinë kushtetuese të kësaj nisme. Ishte e drejta e presidentit që të dëgjohet, por kjo është bërë për të kapur ato afatet teknike që përmendëm”, shtoi ai.
Juristi sqaroi se Gjykata Kushtetuese ka mundësinë që të japë një vendimmarrje, por për këtë duhen 5 vota minimalisht dhe momentalisht kjo gjykatë ka vetëm 7 anëtarë.
“Ka qenë po kjo mazhorancë që e zgjodhi Metën president kur ishte kryetar i një partie politike. Pra, nuk është se Meta u bë politikan aktiv në një moment dhe mbajti një qëndrim të caktuar politik. Mendoj se Gjykata Kushtetuese ka mundësinë që të japë një vendimmarrje, por për këtë duhet 5 vota dhe momentalisht kjo gjykatë ka vetëm 7 anëtarë. Në momentin që nuk arrihet një numër i tillë votash, shfuqizohet vendimi i Kuvendit”, tha Braho.
