Kundër platformës GRTV, gazetarët protestojnë para Kuvendit: Stop censurës

Gazetarë, të cilët kryesisht mbulojnë zhvillimet në Parlamentin e Shqipërisë, duke ndjekur komisionet apo senacat plenare, protestuan sot para Kuvendit, ndërsa kërkojnë tërheqjen e këtij institucioni nga projekti i miratuar për krijimin e një platforme të ngjashme me ERTV, që ndalon reporterët të ndjekin punimet sikundër ka ndodhur deri më sot.

Me pankarta në duar gazetarët janë kundër këtij vendimi si cenim i punës së tyre.

Pak ditë më parë Byroja e Kuvendit vendosi për të mos lejuar praninë fizike të gazetarëve në mbledhjet e komisioneve parlamentare.

Gazetarët janë shprehur se një vendim i tillë është një censurë që i bëhet lirisë së mediave dhe pengon punën e gazetarëve për të pasqyruar atë që ata shikojnë apo evidentojnë me sytë e tyre në zhvillimet parlamentare.

Gazetarët paralajmëruan se do t’i drejtohen institucioneve kryesore në vend si Presidentit, Kryeministrit, Kuvendit, si dhe trupit diplomatik, lidhur me situatën që krijohet nga aplikimi i një platforme të tillë.

“Akreditimi do të thotë barazi për të gjithë. Do të thotë që dua t’i shoh vetë ato që transmetoj. Ndërkohë që ne me këtë vendim duhet të izolohemi. Kam marrë telefonata të ndryshojmë të anëtarëve të Byrosë që thonë se nuk kanë marrë pjesë në këtë, por ky nuk është faji ynë sepse ata mund të jenë duke gënjyer. Nuk dua të transmetoj diçka të kontrolluar nga një organ shtetëror. Dua të trajtoj gjithçka që shoh vetë. I bën thirrje maxhorancës që të tërhiqet. Kjo nuk është një betejë e imja personale, por për çdo gazetar që e ka këtë si punë dhe mision. Është për të gjithë ata që e besojnë fjalën e lirë,” u shpreh gazetarja Esiona Konomi.

Gazetari Juxhin Mustafaraj i ka bërë thirrje që institucioni i Kuvendit të heqë dorë nga kjo nismë që pengon punë e gazetarëve. Mustafaraj tha se kjo vendimarrje është marrë nga një grup deputetësh pa u konsultuar nga gazetarët, duke i pozicionuar këta të fundit në një bodrum.

“Për ta bërë të qartë, Byroja ka marrë një vendimarrje. Këtu është vetëm finalja që deputetët vendosin sa i takon ligjeve. Byroja e Kuvendit ka vendosur që me një vendimarrje të pakonsultuar me gazetarët kanë vendosur që në një bodrum të Kuvendit të vendosen disa televizione përmes regjisë. Një tjetër vendim arbitra është se secili prej gazetarëve që kërkon të zhvillojë intervista duhet të marrë leje. Thirrja që ne si gazetarë i bëjmë Kuvendit është që të tërhiqet nga kjo vendimarrje. Ne kemi hartuar edhe një shkresë dhe presim që të kemi një reflektim,” u shpreh Mustafaraj.

Gazetari Osman Stafa tha se nëse miratohet ky vendim gazetarët do të gjenden në një pozicion shumë të vështirë dhe do të humbasin mision e tyre.

“Ky është misioni ynë nëse na mbyllet dhe kjo derë gjendemi në një pozicion shumë të vështirë. Nëse materialet janë të gatshme dhe shkojnë më media, ç’punë ka gazetari më? Kështu nuk mund ta çojmë përpara misionin tonë,” u shpreh ai.