Mexhit Picari, ish-punonjës policie, dhe vajza e tij, Dhurata Saliaj, u përballën sot me Gjykatën, ku iu caktua masa e sigurisë me burg, për vrasjen e Kudret Saliajt, bashkëshorti i Dhuratës, që ishin në prag divorci.
Nga raportimet mësohet se Mexhit Picari ka shprehur pendim për vrasjen e kryer në një prej lokaleve në qendër të Tiranës, ku shkrehu një karikator pistolete ndaj dhëndërit të tij, dhe plagosi edhe avokatin e viktimës.
“Kërkoj ndjesë publikisht për çfarë kam bërë edhe falje. Të më falin nipërit dhe mbesat, i kërkoj falje edhe vajzës që i vrara burrin. Dhurata s’ka patur dijeni. Pistoletën e kisha në brez dhe se mora në çantën e gocës”, ka thënë ai.
Po ashtu edhe Dhurata Saliaj ka mohuar të ketë gisht në vrasje. Ajo ka deklaruar se nuk e dinte që babai i saj do kryente vrasjen, pasi në të kundërtën s’do e kishte lejuar kurrë.
“Atë ditë isha për gjykatë. S’e dija që babi do bënte vrasje. S’do e lejoja kurrë. Kudreti ishte babai i fëmijëve të mi, s’do e lejoja. Kërkoj mëshirë nga Gjykata, kam tre fëmijë për të rritur”, ka thënë Dhurata.
