Jasir Asani është emri më i përfolur në këtë merkato të verës dhe jo më kot, pasi anësori i Partizanit ka treguar vitet e fundit se është një ndër lojtarët më të mirë në futbollin shqiptar.
26- vjeçari ka tashmë edhe eksperiencën e duhur përveç talentit dhe çdo ekip do ta donte, gjë që faktohet edhe nga ofertat e shumta që mëngjarashi ka marrë gjatë këtyre ditëve. Megjithatë, Asani ende nuk ka vendosur për të ardhmen e tij dhe arsyet i ka treguar në një intervistë të dhënë për “Panorama Sport”.
Jasir Asani, kryefjala e merkatos- Jam munduar të kem disa ditë pushim pas një sezoni tepër të lodhshëm. Është normale që në periudhë merkatoje të flitet rreth futbollistëve dhe së ardhmes së tyre, prandaj nuk është se jam shqetësuar shumë për këta zëra. Kam disa oferta në tavolinë dhe do të vendos me qetësi.
Zhvillimet e fundit- Kam disa oferta në tavolinë, kam pasur bisedime me disa klube. Nuk ka ndodhur asgjë, po pres ende për të vendosur.
Bisedimet për rinovim me Partizanin- Kam folur me drejtuesit e Partizanit, por akordi nuk ka qenë i duhuri. Nuk jemi aty-aty me kërkesat, nuk ka dakordësi mes palëve.
Refuzimet e ofertave ndaj klubet të huaja- Kam refuzuar tri oferta nga Liga e Dytë e Turqisë. Arsyeja është se dua të luaj në elitë, në Turqi, por edhe në Rusi. Gjithashtu, kam edhe një ofertë që e kam lënë në pritje nga Hungaria dhe në rast se nuk vjen një ofertë më e mirë, do të firmos aty.
Aventura te Partizani- Te Partizani kam kaluar momente të paharrueshme, kam pasur gjithmonë mbështetjen e tifozëve dhe të klubit. Fituam edhe titullin kampion, që ishte një arritje e madhe. Edhe sezonin e shkuar ishim shumë pranë fitimit. Megjithatë, eksperienca ime si i kuq ka qenë fantastike.
