Eshte siguruar dosja e paraqitur nga prokuroria për vrasjen e ndodhur në Tiranë të premten e kaluar, ku Mexhit Picari në bashkëpunim me vajzën e tij, qëlluan me armë Kudret Saliaj, me të cilin Dhurata Saliaj ishte në proces divorci.
Në ndryshim nga sa deklaruan babë e bij, se Dhurata nuk ishte e përfshirë në krim, në fakt, pamjet filmike tregojnë se ajo ka pasur rol aktiv në ngjarje, ndërkohë që provat e prokurorisë mbështeten kryesisht në pamje filmike që janë marrë nga lokali ku ndodhi ngjarja.
Sipas prokurorisë, në orën para seancës, ata kanë vëzhguar për të parë Kudret Saliajn në ambientet e gjykatës dhe rrotull saj. Gjatë vëzhgimit kanë vënë re në një kafene avokatin e tij, ndërkohë që bab e bij ulen të dy në të njëjtin lokal, ndërsa sipas prokurorisë arma mbahej nga 32-vjeçarja.
Shpjegimi i pamjeve filmike që ka në dorë prokuroria:
11:36:28 – Kudret Saliaj ka hyrë në bar-kafe dhe është ulur në tavolinën ku ndodhej shtetasi Adriatik Cama.
11:46:11 – Në verandën e lokalit ka shkuar shtetasja Anila Trifoni, e cila është ulur në tavolinë ku ndodheshin Kudret Saliaj dhe shtetasi Adriatik Cama.
11:52:04 – Dhurata Saliaj ishte e ulur me shpinë nga Kudret Saliaj, Adriatik Cama dhe Anila Trifoni, ndërsa përballë saj është ulur shtetasi Mexhit Picari.
11:52:52 – 48 sekonda pasi shtetasi Mexhit Picari dhe Dhurata Saliaj kanë hyrë në lokal, kjo e fundit mbante në dorë një objekt me ngjyrë të zezë.
11:53:03 – 11 sekonda më pas, shtetasi Mexhit Picari ka zgjatur dorën e djathtë drejt objektit, në dukje si ajo e një arme të zjarrit, të llojit pistoletë.
11:53:07 –Picari është ngritur nga tavolina, ku me të dyja duart ka mbajtur pistoletën dhe duke e mbushur atë ka përparuar drejt tavolinës me tre persona.
11:53:09 – Tre sekonda më vonë ai ka hapur zjarr, duke qëlluar katër herë drejt Kudret Saliajt dhe një herë drejt avokatit Cama.
Nga pamjet rezulton se Saliaj është rrëzuar, ndërsa Cama ka lëvizur nga tavolina. Nëntë sekonda më vonë, Dhurata Saliaj është ngritur nga tavolina dhe është larguar në të njëjtin drejtim nga iku Mexhit Picari, duke u larguar të dy nga vendi i ngjarjes.
Menjëherë pasi janë larguar nga lokali, Picari dyshohet se ka qëlluar dhe dy herë të tjera në ajër dhe më pas e ka hedhur armën në lumin e Lanës. Gjatë seancës së sotme, ku Gjykata ka dhënë për të dy masën e arrestit me burg, Picari u mundua që të shfajësonte vajzën e tij, duke thënë se armën e ka pasur në brez, dhe vrasja nuk ka qenë në bashkëpunim.
Vetë Dhurata Saliaj nga ana e saj ka thënë se ajo me Kudretin kanë tre fëmijë, dhe nuk mund të ishte bashkëpunëtore në krim. Por pavarësisht pretendimeve, pamjet filmike që kanë qenë të qarta për prokurorinë, rrëzojnë pretendimet e të pandehurve.
Ata veç të tjerave do të përballen me akuzat “Vrasja e funksionarëve publikë” e kryer në bashkëpunim e mbetur në tentativë, ”Vrasja për shkak të marrëdhënieve familjare” e kryer në bashkëpunim, ”Vrasja në rrethana cilësuese” e kryer në bashkëpunim” dhe “Armëmbajtja pa leje”.
