Nga BoldNews.al
Nëse ende nuk e ka kuptuar se është Ministër i Brendshëm, dikush nga oazi i Rilindjes duhet t’ia rikujtojë se detyrë parësore ka sigurimin e rendit për qytetarët dhe zbulueshmërinë e krimit, më pas vijnë të tjerat. Por Çuçi i Ramës ka habitur jo pak sot kur në postimet e tij në rrjetet sociale është vetëkënaqur me “arritjen e madhe” të shkatërrimit selektiv të disa kioskave apo ndërtimeve të tjera në bregdet.
Zgjodhi pikërisht Ksamilin për të treguar “forcën e shtetit”, atë vend ku ende nuk është tharë gjaku i një 48vjeçari që u vra mbrëmjen e djeshme në pragun e shtëpisë. Gramoz Memaj humbi jetën pasi u qëllua disa herë me armë kallashnikov dhe autorët mundën të largoheshin, ndonëse Kasmili vetëm një rrugë ka, sepse policia lokale e Sarandës nuk ishte në gjendje që të ndalonte autorët.
Ministri i Brendshëm Bledi Çuçi ka publikuar pamjet nga shembja e ndërtimeve pa leje në Ksamil në kuadër te operacionit “Bregdeti Ynë”. Ai shprehet se ky aksion do të vazhdojë përgjatë gjithë vijës bregdetare për të çliruar çdo hapësirë të zaptuar dhe për vënë para përgjegjësisë shkelësit e ligjit. “Ka nisur në Ksamil e Velipojë shembja e ndërtimeve pa leje. Operacioni “Bregdeti Ynë” do të vijojë përgjatë gjithë vijës bregdetare, për të çliruar çdo hapësirë të zaptuar dhe për të vënë para përgjegjësisë shkelësit e ligjit”, shkruan ai.
Po ai që vret a është shkelës ligji? Po ikin jetë njerëzish në atentate të mirëorganizuara të cilat lajmërojnë të tjera viktima, vetëm koha ndryshon, por jo forma. Ministri dhe kryepolici i vendit duhet të ishin në Vlorë, Elbasan, Shkodër dhe kudo tjetër ku krimi i organizuar ka ngritur krye, por të dy personat përgjegjës për rendin dhe sigurinë janë në “majë” të fadromave për të dhuruar spektaklin e përvitshëm në shembjen e kioskave dhe ndonjë lokali që nuk është pjesë e enturazhit politik të tyre.
Qytetarët në radhë të parë kërkojnë siguri, që kur të shkojnë me pushime me familjen të mos bëhen qoftë edhe aksidentalisht “mish” për “topat” e krimit, që shpesh lëviz lirshëm edhe për shkak të mbështetjes politike dhe të krerëve të policisë. Rendi sot po lëngon dhe nuk mundet që të goditet me shfaqje propagandistike me dergimin e RENEA-s për pak ditë në Vlorë dhe Elbasan dhe më pas kthehen sërish në repartin e tyre në pritje të lajmërimit të për krimin e radhës.
Çuçi po çon në vend “amanitin” e Ramës i cili për të treguar se propaganda i ka antenat e ngritura lajmëroi “shkatërrim masiv” për objektet pa leje dhe dënim deri në 15 vite burg pë rata që ndërtonin në mënyrë të paligjshme. Edhe kjo formë ndodh çdo prag sezoni turistik ku pushuesit duhet të durojnë zhurmën mbytëse të fadromave dhe të kenë si pamje pigje me inerte. Por edhe në spektaklin e propagandës ndodh që Çuçi të bëhet “gazi botës”, kur aksionin sipas tij shumë të madh e mbyllin me vetëm 15 objekte të shkatërruara në Velipojë dhe Ksamil. Krimi nuk kapet me fadromë.
