Jasir Asani është pranë largimit nga Partizani. Sulmuesit i ka përfunduar kontrata me të kuqtë dhe ditën e djeshme u zbulua se lojtari është pranë firmës me Kisvardan në kampionatin hungarez.
“RTSH Sport”, ka zbuluar ditën e sotme edhe kontratën dhe pagën që Asani do të përfitojë në Hungari, ndërsa firma pritet të hidhet javën e ardhshme.
26-vjeçari do të përfitojë rreth 350 mijë euro për dy sezone, ndërsa me bonuset në kontratë mund të shkojë deri në 400 mijë euro. Asani do të ketë edhe një klauzolë për zgjatjen e kontratës edhe më një tjetër vit, nëse të dyja palët do të bien dakord që të vijojnë bashkëpunimin.
