Java që nis nesër ka zhvillime të forta politike, që nisin me votimin në Kuvend të kërkesës së Komisionit Hetimor për shkarkimin e Ilir Metës nga posti i Presidentit dhe përmbyllet me votimin e kreut të ri të PD-së, zgjedhje që do të mbahen më 13 qershor.
Të mërkurën, në 9 qershor, Kuvendi pritet të zhvillojë seancën ku do të shqyrtohet raporti i Komisionit Hetimor për shkarkimin e Presidentit të Republikës me argumentimin se ka shkelur rëndë Kushtetutën. Për të larguar nga detyra Kreun e Shtetit, Parlamenti duhet të votojë me 94 vota pro, por vendimin e fundit e jep Gjykata Kushtetuese që do vulosë shkarkimin ose jo të presidentit.
Presidenti është shfaqur i pa shqetësuar për nismën për shkarkimin e tij. Pasi injoroi Komisionin Hetimor, duke e cilësuar si jolegjim, Ilir Meta duket i bindur që do qëndrojë në zyrën e presidentit deri në 22 korrikun e viti që vjen, kur dhe i përfundon mandati kushtetues në krye të shtetit.
Tre ditë pas seancës për shkarkimin e Ilir Metës, në datën 12 qershor Partia Socialiste, në 30-vjetorin e saj mbledh Kongresin ku do të bëhet një analizë e zgjedhjeve të 25 prillit. Në Kongresin e PS priten ndryshime në strukturat vendore, ndërsa është paralajmëruar se Krzeministri Edi Rama mund të bëjë të njohur edhe ndryshimet e pritshme në disa nga institucionet kryesore të vendit, por edhe emrat e Qeverisë së re.
Në kahun tjetër, Partia Demokratike më 13 qershor, zgjedh Kryetarin e saj, ku anëtarësia iu drejtohet kutive të votimit për të zgjedhur mes katër kandidatëve. Në fletën e votimit renditen Fatbardh Kadillin, Edit Harxhin, Agron Shehajn dhe kryetarin në detyrë Lulzim Basha.