Deklaratat e Dendias për detin/ Vasili: Rama po bën veprime të errëta ndaj Shqipërisë, po mban sekrete

Nënkryetari i LSI-së, Petrit Vasili duke folur në SYRI TV, ka vënë në dyshim marrëveshjen e Edi Ramës me Greqinë në lidhje me ndarjen e detit.

Vasili është shprehur se lajmet për marrëveshjet e Shqipërisë me Greqinë vijnë vetëm nga shteti fqinj, pasi Rama i mban sekret.

‘Thelbi i çështjes janë kufijtë e Shqipërisë. Është një çështjet nga më të mëdhatë që është në diskutim. E gjithë mënyra e trajtimit të kësaj çështjeve shoqërohet me veprime të errëta, jo transparente që shmangin rrugën ligjore dhe kushtetuese. Të gjithë këto i hapin rrugën për të ecur përpara vendimeve finale, vendime të cilat kur ndjekin këtë rrugë janë vetëm në dëm të Shqipërisë dhe shqiptarëve.

Ministri i Jashtëm grek Dendias deklaroi se ka arritur një marrëveshje politike me Edi Ramën në tetor. Praktikisht asnjë shqiptar, asnjë media, askush tjetër përveç Edi Ramës dhe enturazhit të tij të errët, nuk e njeh këtë marrëveshje.

Lajmet për këtë çështje delikate që ka implikime ekonomike të jashtëzakonshme, miliarda euro, ku ndodhen rezerva nafte të mëdha, vijnë vetëm e vetëm nga Greqia. Kur diskutohet çështja që palët paskan renë dakord dhe shkojnë në gjykatë, duhet ditur nëse kjo është një zgjidhje në favor të Shqipërisë, apo u jep përparësi interesave greke’, tha Petrit Vasili.