Debutoi me Kombëtaren, Selmani: Ëndërr e bërë realitet, jam gjithmonë i gatshëm për vendin tim

Gentian Selmani provoi sot për herë të parë emocionet e aktivizimit me kombëtaren kuqezi. Portieri 23-vjeçar e zhvilloi të plotë miqësoren ndaj Uellsit, që përfundoi në barazim pa gola.

“Gardiani” i Boluspor në Turqi, zhvilloi një ndeshje shumë të mirë, tregoi aftësitë e tij dhe ndihmoi Shqipërinë të mbajë të paprekur portën ndaj rivalëve ishullorë.

Edhe pse është grumbulluar disa herë me kombëtaren, vetëm sot erdhi debutimi i Selmanit, i cili ka folur rreth emocioneve të provuara në një postim në Instagram.

“Jam i lumtur dhe krenar për debutimin tim me ekipin kombëtar. Kam qenë dhe do jem gjithmonë i gatshëm sa herë që të më jepet mundësia.

Ishte një ëndërr e bërë realitet. Përgëzoj ekipin për paraqitjen dhe shpresoj të vazhdojmë me ndeshje të mira, që të rivalizojmë denjësisht në eliminatoret e botërorit“, shkruan portieri i talentuar.