Shembja e urës në Darëzez, arrestohet shoferi për të mbuluar mashtrimin elektoral

Një ditë më parë u raportua shembja e një ure në Darëzez të Fierit. Ura ishte premtuar gjatë fushatës elektorale nga Rilindja e Edi Ramës se do të ndërtohej, madje përballë presionit të banorëve të zonës, u angazhuan edhe disa punëtorë gjatë fushatës që do të ndërtonin urën.

Por pas zgjedhjeve, ata punëtorë u zhdukën dhe banorët u revoltuan pasi iu ishte thënë se ura do ishte gati për sezonin turistik.

Sikur të mos mjaftonte kjo, edhe ura e amortizuar që lidhte zonën me pjesën tjetër të vendit, është shembur dje në mëngjes.

Ngjarja vjen vetëm pak ditë pas çeljes së sezonit turistik dhe do të dëmtojë shumë edhe bizneset që ka kjo zonë bregdetare.

Të premten u raportua se një 52-vjeçar ka rënë në prangat e policisë, pasi ditën e djeshme teksa kalonte me kamionçinë, ka shembur urën e Darëzezës. Bëhet fjalë për shtetasin Luftar Panahori.

Burime zyrtare nga policia bënë me dije se 52-vjeçari akuzohet për veprën penale “Shkatërrimi i rrugëve”.

Panahori akuzohet se duke drejtuar automjetin me një rimorkiator, mbi të cilin kishte ngarkuar një skrep, ka kaluar në urën e rrugës automobilistike Fier-Darëzezë jashtë tonazhit të parashikuar në tabelën sinjalistike, duke e shembur urën.