“Falënderoj tifozët e kuq për 3 vitet e mrekullueshme”, Çinari prezantohet te Samsunspori. Ja paga që do të përfitojë sulmuesi

Sulmuesi shkodran, Eraldo Çinari, nuk është më pjesë e Partizanit. 24-vjeçari është lojtari më i ri i Samsunsporit.

Klubi i Ligës së Parë turke ka zyrtarizuar gjithçka në faqet zyrtare të klubit, teksa shkodrani ka firmosur një kontratë për 3+1 vite, ku do të përfitojë plot 500 mijë euro.

Pas zyrtarizimit te klubi turk, Çinari falënderoi të gjithë familjen Partizani, duke shkruar: “Sot ishte një ditë që solli një kapitull të ri në karrierën time futbollistike. Nga dita e sotme, unë nuk do jem më pjesë e klubit të futbollit Partizani. Kontrata ime me klubin përfundoi në fund të këtij sezoni dhe unë tashmë jam duke përgatitur një aventurë të re.

Falënderoj të gjithë në familjen Partizani, duke filluar nga presidenti dhe drejtori, që më kanë qëndruar afër si në momente pozitive e po ashtu negative, trajnerët me të cilët kam punuar këto 3 vite. E po ashtu shokët e skuadrës, si edhe gjithë stafin që punon te kjo familje. Një falënderim special shkon për tifozët e kuq e sidomos ‘Ultras Guerrils’. Ishin 3 vite të mrekullueshme ku edhe fitova trofe”, shkroi Çinari.