Trafikonin tritol dhe armatim luftarak, burg për tre të arrestuarit në Durrës

Gjykata e Durrësit ka caktuar masën arrest me burg për tre të arrestuarit në operacionin e koduar “Binomi”.

Burimet policore bëjnë me dije se në burg u lanë Barim Flora, 42 vjeç,  Ardjan Gjoka 33 vjeç dhe Jemin Flora 33 vjeç të cilëve policia në automjet u gjeti 4.6 kg lëndë plasëse tritol dhe C-4, një kallashnikov, municion luftarak, granata dore dhe kapsolla detonatore.

Ata u kapën në një makinë pranë mbikalimit të Shkozetit në Durrës pasditen e 1 qershorit, teksa policia thotë se ishin nën hetim prej gati një muaji për përfshirje në trafikimin e lëndëve eksplozive dhe municioneve, në qytetet e Tiranës dhe Durrësit.

Policia ka dyshime për një rrjet të mirëfillte trafiku, ndaj duke u treguar e rezervuar në detaje thotë po punohet për identifikimin dhe arrestimin e personave të tjerë.