Nga Boldnews.al
Në Vlorë janë bërë gati shezlonët me shpresën se do të vijnë pushues. Bizneset kanë ngritur qepenët, ndërsa krimi po mbush armët duke i zbrazur në mes të qytetit dhe lënë pas viktima. Për tre javë në qytetin e Vlorës u vranë tre persona, ndërsa një tjetër u plagos rëndë në sy të dy fëmijëve të mitur.
Nuk janë vetëm krime të izoluara, por ngjarje të paralajmëruara që ngrenë krye herë pas here, ndonëse propaganda qeverisëse mundohet t’i mbulojë. Të katra ngjarjet mbesin pa autor dhe policia nuk ka mundur të verë në pranga njerëzit që i marrin jetën një rivali në trafiqe, duke mbajtur nën ankth edhe mijëra qytetarë me pasiguri për jetën.
Pritet një “festë e madhe” në hapjen e sezonit veror nga kryeministri Edi Rama, superdeputeti i Vlorës Damian Gjiknuri dhe Ministri i Brendshëm Blendi Çuçi. Do flasin për Vlorën turistike, për nismat e qeverisë me projektet haluçinative 3D, por asnjë fjalë për çështjen e rendit. Janë pasojat e kanabizimit të vendit gjatë viteve 2016-2017 të cilat fuqizuan grupe të ndryshme kriminale të lidhur me drejtuesit e policisë dhe elitës së pushtetit që sot janë rikthyer me armë në mbrojtje të parasë së pisët.
U dhanë krah bandave që tashmë kanë ngritur krye kundër njëri-tjetrit në prishjen e pazareve të drogës apo të “konkurencës” në fushën e trafiqeve. Kërkohet prani më e madhe e strukturave të rendit dhe veçanrisht të hetimit kundër jetës dhe pronës, por më shumë shihen efektivë që ngrenë poztblloqe rrugëve dhe zbarkojnë nëpër skutat e qyteteve duke ndëshkuar me gjoba drejtuesit e automjeve të parkime të gabuara.
Të tjerë punonjës të policisë janë të zënë duke “ndëshkuar rëndë” banorë të fshatrave që ndërtojnë një avlli apo rikonstruktojnë çatinë e shtëpisë, ndërsa e lenë të qetë madje e mbrojnë krimi që pastron paranë në ndërtimet e kullave, bareve dhe resorteve turistike.
Kemi një Ministër të Brendshëm i cili parësore në punën e tij ka mbajtjen e një profili të ulët në publik dhe shijimin e një “jete qejfi”, duke mos e kuptuar ende se të jesh Ministër i Brendshëm në një vend ku rendi mbetet pika kyçe në shoqëri. Fundja edhe kur u informua se e kishin rritur në detyrë Çuçi sapo kishte dalë nga një serë me domate dhe kastraveca, që i provoi për shije.
U bë ministër i “madh” pa e pyetur kush. Rama i vari një këmborë në qafë për të shuar zërat kritik, pasi nga tre ish-ministrat e tij të mëparshëm dy u akuzuan për lidhje të drejtëpërdrejtë me trafikun e drogës, ndërsa i treti që vinte nga radhët e ushtrisë u detyrua të japë dorëheqjen pasi policia ekzekutoi në pragun e shtëpisë një 25-vjeçar të pafajshëm.
Për Ramën dhe Çuçin edhe kjo situatë ka një “zgjidhje”, ku sa herë të ndodhin vrasje të këtij kalibri me ekzekutime dhe largim pa gjurmë të autorëve mbytet me disa kronika ku të shfaqet vetë Rama në Vlorë për sezonin turistik, ndonëse për muzikë ka zhurmën e kallshnikovëve.
