Katër persona janë arrestuar nga policia e kryeqytetit pasi akuzohet se kishin kthyer në “shtëpi bari”, një banesë të marrë me qera.
Gerhard Duro 37 vjeç, Skënder Ismaili 44 vjeç, Ervin Shametaj 30 vjeç dhe J.V. 17 vjeç janë vënë në pranga në kuadër të aksionit të koduar “Kimisti”, të kryer nga policia dhe prokuroria e Tiranës.
Këta persona akuzohen se në bashkëpunim me njëri-tjetrin, kishin përshtatur banesën e marrë me qira nga Ervin Shametaj, me aparatura që shërbejnë për kultivimin e bimëve narkotike.
Gjatë kontrollit të banesës u gjetën fidanë të dyshuar narkotik kanabis, të kultivuar në kushte laboratorike, fara kanabisi dhe 1 peshore elektronike, që u sekuestruan në cilësinë e provës materiale.
Gjithashtu nga kontrolli i ushtruar në automjetet me të cilën këta persona qarkullonin u gjetën dhe u sekuestruan fidanë të dyshuar kanabis, që po ashtu u sekuestruan në cilësinë e provës materiale.
