Mandatet e Vlorës, Kolegji rrëzon ankimimet e PD-LSI/ Kaso: Vendimmarrja u paracaktua

Kolegji Zgjedhor rrëzoi pretendimet e opozitës për pavlefshmëri zgjedhore në qarkun Vlorë duke legjitimuar mandatet e 25 prillit.

Partia Demokratike akuzoi vendimmarrjen e gjyqtarëve si të paracaktuar, kjo për faktin se brenda 24 orëve Kolegji Zgjedhor rrëzoi dy herë pretendimet e Partisë Demokratike dhe Lëvizjes Socialiste për Integrim për pavlefshmëri zgjedhore.

Pas Gjirokastrës, edhe Qarku Vlorë u certifikua nga trupa e gjyqtarëve duke lënë në fuqi ndarjen e mandateve 8 për Partinë Socialiste dhe 4 për Partinë Demokratike.

“Rrëzimi i ankimit të Partisë Demokratike dhe Lëvizjes Socialiste për Integrim si të pabazuar në prova”, u tha në fund të seancës në vendimin e Kolegjit. Ivi Kaso, përfaqësues ligjor i PD, tha se vendimmarrja u paracaktua.

Seanca në Kolegjin Zgjedhor zgjati për 90 minuta. Në radhën e ankimeve është qarku i Beratit ku edhe për këtë zonë zgjedhore, opozita kërkon pavlefshmëri.