Një nga dy elektricistët që një ditë më parë ranë në kontakt me rrymën elektrike në Gjirokastër, kanë humbur jetën. Policia konfirmoi këtë të Martë se dy elektricistët e OSHHE-së ishin duke punuar një ditë më parë për rregullimin e një linje në lagjen Gërhot, kur kanë rënë në kontakt me rrymën elektrike.
Lidhur me ngjarjen, është arrestuar drejtuesi i punimeve të OSSH-së dhe është proceduar një operator i dispeçerisë së OSSH-së Gjirokastër.
Policia njoftoi se specialistët për Hetimin e Krimit Ekonomiko-Financiar në DVP Gjirokastër arrestuan në flagrancë për veprat penale “Shpërdorim i detyrës” dhe “Shkelja e rregullave të mbrojtjes në punë”, shtetasin Sh.O., 52 vjeç, banues në Gjirokastër, me detyrë drejtues i punimeve të grupit të ngritur nga OSSH Gjirokastër, pasi ditën e djeshme, gjatë riparimit të një linje elektrike në lagjen Gërhot, dyshohet se për shkak të moskryerjes së kontrollit dhe mungesës së monitorimit në punën e elektricistëve, janë dëmtuar dy elektricistë, shtetasit G.C. dhe A.T..
Shtetasi G.C. ka ndërruar jetë më vonë në spital.
Gjithashtu u referuan materialet në Prokurori për veprën penale “Falsifikimi i dokumenteve”, për shtetasin K. H., 64 vjeç, banues në Gjirokastër, me detyrë operator i OSSH Gjirokastër, pasi dyshohet se ka falsifikuar dokumente duke ndërhyrë në librin e dispeçerisë së OSSH Gjirokastër.
DENONCO