Kryetari i Bashkisë së Vlorës, Dritan Leli, duket se do të jetë i ndëshkuari i parë në rradhët e socialistëve nga Kryeministri Edi Rama.
Ndaj Lelit ka nisur një fushatë sulmesh dhe akuzash, ndërsa deputeti socialist i rradhës që duket se ka kthyer në “tabelë qitjeje” Kryebashkiakun është Anduel Tahiraj, i cili mori mandatin e ligjvënësit më 25 prill.
Ai ka dalë në bulevardin e qytetit shoqëruar nga disa të rinj me pretendimin për pastrimin e tij.
“Nuk presim të zgjohet kryetari nga gjumi”- ka thënë Tahiraj.
Tahiraj ka zgjedhur për të pastruar një zonë (bulevardin) që në fakt nuk ka probleme me mbetjet, por duket se këtë zonë Tahiraj e ka zgjedhur pikërisht për të dhënë mesazhin.
Vetëm disa ditë më parë, ndaj Lelit akuza ngriti dhe deputeti tjetër i zgjedhur në Vlorë Ilir Metaj.
Që prej refuzimit të Lelit për të lënë postin e kryetarit të Bashkisë, në zgjedhjet e 25 Prillit, sulmet ndaj tij nga socialistët kanë qenë të vazhdueshme, ndërkohë që divorci me familjen e tij politike duket tashmë i pakthyeshëm.
