Sergio Busquets mund të jetë një lojtar i Bayernit të Mynihut. Spanjolli që luan në Barcelonë mund të detyrohet, për shkak të problemeve financiare, të lërë klubin katalanas. Sipas “Carrusel Deportivo”, edhe pse ka një kontratë deri në 2023 me ta, Bayerni mund ta rrëmbejë atë në Mynih.
Ai shihet si njeriu i duhur për mesfushën e Julian Nagelsmann, trajneri që do të drejtojë kampionët e Gjermanisë në sezonin e ardhshëm. Busquets mund t’i kushtojë Bayerni gati 30 milionë euro, edhe pse Hasan Salihamixhiç po punon për një çmim më të ulët. Kujtojmë se bavarezët ishin në ndjekje edhe të mesfushorit holandez, Gini Wijnaldum, i cili zgjodhi t’i bashkohej Barcelonës ditët e fundit me parametra zero.
Kjo është një arsye më shumë për Busquets që të zgjedhë Bayernin, duke parë që në sezonin që vjen, do të ketë shumë pak minuta në dispozicion. Vetë spanjolli në një media vendëse u shpreh pak ditë më parë se do t’i kërkonte klubit katalanas qartësi për pozicionin në skuadër.
“Jeta ime është lidhur shumë me këtë skuadër. Kam vite që jam pjesë e Barçës dhe kjo ka qenë ëndrra ime, por situata tani ka ndryshuar dhe mendoj që ka ardhur koha për të folur me drejtuesit dhe për të kërkuar se çfarë do të bëhet. Jam i bindur që do të gjejmë një zgjidhje të mirë për të dyja palët, edhe pse tani mendja ime është tek Europiani me Spanjën, një kompeticion që duam ta fitojmë”, u shpreh ish-kampioni i botës dhe Europës me iberikët. Kujtomë se lojtari ka dalë nga akademia e Barcelonës dhe që atëherë ka qenë pjesë e katalanasve duke fituar shumë tituj në Spanjë dhe jashtë saj.
