Banorët e fshatit Lumas nuk i kanë ndaluar asnjë ditë protestat e tyre, duke bllokuar firmën për të zbatuar projektin për marrjen e ujit të burimit të Sinecit.
Banorët kanë filluar protestat e tyre dy muaj më parë, duke kërkuar pezullimin e projektit nga ana e bashkisë, ndërkohë që prej 10-ditësh,kur edhe firma kontraktuese u shfaq në zonë,ata kanë pezulluar punën e çdo mjeti duke bllokuar rrugën e duke u përleshur edhe me policinë.
Sot, në ditën e 10-të qëndresës së tyre, është bashkuar pasditen e sotme edhe ambientalisti Sazan Guri, i cili ka deklaruar se do t’i mbështesë banorët në këtë kauzë për të mos lejuar shfrytëzimin e burimit natyror të Sinecit.
“Ka dy vite këta banorë janë kërcënuar se do tu marrin burimin e ujit, që quhet Syri Kaltër i Sinecit. Sot këta banorë lundrojnë mbi ujë, kanë ujë të bollshëm 24 orë për të pirë, kanë ujin e lumit që kalon këtu për të vaditur në mënyrë natyrale këto toka të begata dhe këtë ujë burimi po kërkojnë t’ua marrin për qëllimet e tyre korruptive. Ujin e burimit të Sinecit po kërkojnë t’ua marrin duke i gënjyer, pasi nuk kanë ardhur as me studim e as me projekt dhe nuk kanë kryer asnjë dëgjesë publike me banorët.
Banorët e kanë kundërshtuar këtë projekt,duke grumbulluar firmat dhe duke e dërguar çështjen në Gjykatën Administrative dhe në SPAK. Unë jam hidrogjeolog,e njoh mirë zonën dhe këtu janë shtatë puse me ujë që prodhojnë 11metër kub ujë vetëm një pus.
Kjo do të thotë se këta banorë nuk kanë nevojë për ujësjellës dhe kryetari i bashkisë Kuçovë nuk kërkon të ndërtoj ujësjellës por ndonjë HEC apo ç’dreq tjetêr për biznes”-,ka thënë Guri. Ai ka denoncuar publikisht edhe deputetin Bardhyl Kollçaku,që gjatë një takimi me banorët u ka thënë se edhe ajrit ka të drejtë shteti ti vërë taksa. “Ajri është e vetmja gjë që nuk blihet o deputet prandaj gjej momentin dhe kërkoi falje këtyre banorëve”, tha Guri.
DENONCO