Një vrasje e dyfishtë që tronditi qytetin e Krujës në muajin qershor 2020, sipas prokurorisë ka si autor kryesor shtetasin e shpallur në kërkim ndërkombëtar, Roland Pula.
Nga hetimet e kryera përgjatë një viti ka rezultuar se ai, ka qëlluar me armë zjarri automatike mbi dy vëllezërit, Gramoz e Xhentil Bardhi, teksa këta të fundit, ishin duke hyrë në derën e banesës së tyre në fshatin Gramzë të Krujës.
Në kërkesën për gjykim thuhet se dy vëllezërit kishin pasur konflikte të mëparshme me Pulën dhe si pasojë e zgjatjes së përplasjeve ka ardhur dhe ngjarja e qershorit 2020.
Konflikti e ka zanafillën në 19 gusht të vitit 2005, kur vëllai i Gramoz dhe Xhontil Bardhi, Eltoni, ka plagosur me thikë Besnik Pulën.
Kjo ngjarje ka ndodhur rreth orës 19:30. Pas ngjarjes Elton Bardhi është larguar në drejtim të paditur. Rezulton se në të njëjtën date, në 19 gusht 2005, nipi i Besnik Pulas, Rolandi, ka shkuar në banesën e agresorit dhe qëllon me kallashnikov në drejtim të dritares dhe portës kryesore të shtëpisë.
Në atë periudhë, prokuroria dhe policia e Krujës fiksuan si prova materiale gëzhoja dhe predha të plumbave, duke akuzuar direkt Roland Pulën.
Por gjatë gjykimit avokati i të pandehurit ka pretenduar se i akuzuari në atë kohë ishte në Greqi dhe për këtë paraqiti një vërtetim të sjellë nga punëdhënësi Mark Ndoj.
Mirëpo sipas korrespondencave me letër porosite me shtetin grek, gjatë gjykimit pretendimi nuk është provuar.
Si pasojë trupa e ka dënuar me 5 vite burg Elton Bardhin dhe me 1 vit e 3 muaj burgim Roland Pulën për goditjen me armë të banesës
Mirëpo 4 vite pas kësaj ngjarje në datën 25 mars 2009 është regjistruar një tjetër dosje për akuzën e “Mbajtjes pa lejë të armëve të zjarrit”.
Kjo pas kallëzimit të bërë nga Frrok Pula, me argumentin se Kol Bardhi, babai i Elton Bardhit, dhe dy viktimave Gramoz dhe Xhentil Bardhit, i ka qëlluar me armë zjarri në drejtim të tij duke i thëne se:“…do të vras me gjithë familje…”.
Kjo dosje është hetuar për gati një vit dhe më pas është pushuar.
Ndërkohë në muajin qershor 2020, Roland Pula, nipi i Besnik Pula, ka ekzekutuar me automatik dy vëllezërit Xhentil dhe Gramoz Bardhi.
Pas vrasjes ai është larguar me shpejtësi me një automjet, duke mos u arrestuar sot e kësaj dite nga policia e Shtetit/ Oranews.
