Deputeti i zgjedhur demokrat Agron Gjekmarkaj i ftuar në emisionin ‘’Frontline’’ të Marsela Karapanços në News24 ka folur për zgjedhjet për kryetar në PD.
Gjekmarkaj ironizon me kandidatët e tjerë përballë Bashës duke thënë se PD nuk është ”call-center” dhe s’mund të kandidojnë figura të vogla me ambicie komike.
‘’Në PD nuk mund të përsëritet skema e Edi Ramës me sondazhe të trukuara e të tjera mekanizma. Ose të ketë figura të vogla me ambicie komike. PD nuk është call-center. ‘’– tha Gjekmarkaj.
Gjekmarkaj thotë se Basha momentalisht është dukshëm më fitues dhe protagonist, dhe detyra e tij tashmë është të marrë mandatin e mbrojë partinë.
Sipas tij, zgjedhjet e 25 prillit ishin masakra elektorale më e madhe e 30 viteve demokraci dhe për këtë s’ka pse të fajësohet apo akuzohet Basha.
Për kandidatët që pranojnë masakrën elektorale dhe i kërkojnë dorëheqjen Bashës, Gjekmarkaj thotë se janë në garë vetëm për ambicie personale për t’u bërë kryetar.
Ndërsa për shpalljen ‘non grata’ të Berishës, Gjekmarkaj ripërsërit se ishte një aksident dhe nuk do dëshironte kurrë që Rama apo ndonjë përfaqësues i PS t’i ndodhte e njëjta gjë.
“Shiko, së pari nuk do doja asnjë shqiptar të shpallur non grata nga SHBA, as nga kundërshtarët politikë. S’është gjë e mirë për vendin. Berisha ka qenë Presdient, kryetar i PD. 8 vite pa pushtet dhe këtu është paradoksi, pra pse, çfarë ka ndodhur. Nuk do doja të shpallej Rama e asnjë tjetër nga PS. Shpresoj të kemi transparencë të plotë. Të kuptojmë pse është marrë ky vendim”, tha deputeti Gjekmarkaj.
