Napoli mbeti jashtë Champions League këtë sezon, pasi e mbylli Seria A në vendin e pestë. Barazimi në ndeshjen e fundit kundër Verona, duket se ka qenë dhe ndeshja fatale për trajnerin Gennaro Gattuso.
Presidenti i Napolit ka njoftuar se Gattuso nuk do të jetë më pjesë e skuadrës. Ma anë të një postimi në mediat sociale, Aurelio De Laurentiis ka njoftuar se marrëdhënia me trajnerin italian është mbyllur.
“I dashur Rino, jam i lumtur që kam kaluar gati dy sezone me ju. Duke ju falënderuar për punën tuaj, ju uroj suksese kudo që të shkoni . Një përqafim edhe për gruan dhe fëmijët tuaj. Aurelio De Laurentiis“, ky është postimi që largon zyrtarisht Gattuson nga stoli i Napolit.
Emri i trajnerit italian prej kohësh lakohej si i rrezikuar për t’u larguar, por duket se zyrtarët e klubit të Napolit kanë pritur fundin e sezonit për të marrë këtë vendim. Tashmë pritet që De Laurentiis të gjejë një emër të ri për t’i besuar drejtimin e skuadrës sezonin e ardhshëm.
Ditën e djeshme është mbyllur Seria A në Itali, ku kampion u shpall Interi. Në vendin e dytë u rendit Milani, më pas Atalanta dhe Juventus, skuadra të cilat arritën që të siguronin një vend në Champions League.
