Janë mbyllur dy supersfidat e javës së parafundit të Kategorisë Superiore. Vllaznia ka mundur të fitojë me shifrat 0-1 ndaj Partizanit, ndërsa Laçi e Teuta janë ndarë në barazim pa gola.
Në Tiranë, në Partizani-Vllaznia ndeshja nisi shumë e kujdesshme dhe skuadrat ishin të vendosura mirë, me sulmuesit, që me cilësitë e tyre individuale, pa shumë mbështetje u munduan të krijojnë raste, por pa pasur raste flagrante.
Në pjesën e dytë ekuilibrat u prishën dhe Vllaznia fillimisht nisi më vrullshëm dhe fitoi terren. Më pas Partizani u kthye dhe krijoi dy raste me Muratajn dhe Idrizajn nga jashtë zone. Edhe Vllaznia kishte raste, me portierin Hoxha, që u përgjigj mirë.
Në minutën e 73-të ndodhi episodi që vendosi gjithçka. Një prekje e dyshimtë me dorë në zonë, pretendime të forta të shkodranëve dhe shqyrtim prej rreth 2 minutash nga ana e gjyqtarit. Në fund u akordua penallti. Marku e mori përsipër dhe goditi fort, duke shënuar.
Me këto rezultate, titulli mbetet ende i hapur por Teuta është favoritja për tu shpallur kampion. Durrsaket renditeten te paret, me pikë të barabarta me Vllazninë (63). I vetmi avantazh i Teutës është 1 gol më shumë në diferencën e rrjetave të shënuara dhe të pësuara. Pas tyre vjen Partizani me 62 pikë.
Në javën e fundit, Teuta luan me Apoloninë, Partizani sfidon Bylisin, ndërsa Laçi e Vllaznia ndeshen së bashku.
