Eni Imami mendon se sfida mes Vllaznisë dhe Partizanit do të vendosë titullin kampion në Superiore. Mbrojtësi i kuqebluve, i cili do të luajë titullar në mungesë të Isaevskit, në konferencën për shtyp para ndeshjes, u shpreh.
“Është ndeshje vendimtare, sepse kanë mbetur edhe 180 minuta dhe nesër ndahet çdo gjë në lidhje me ekipin që do të fitojë titullin. Dëmtimi? E kam vuajtur shumë sepse nuk prisja të qëndroja kaq gjatë jashtë. Fatmirësisht, u riktheva dhe më bëhet shumë qejfi që trajneri e tha edhe publikisht që kam bërë paraqitje të mirë ndeshjen e shkuar.”
Koha e gjatë jashtë: “E kisha pak me siklet, të them të drejtën, sepse kam qëndruar 2 muaj jashtë dhe nuk janë pak. Uroj ta vazhdoj formën e mirë edhe në tri ndeshjet e mbetura. Në mbrojtje do të bëjmë më të mirën tonë dhe shpresoj që Partizani të mos shënojë ndaj nesh. Mungon Asani? Dihen vlerat e tij, këtë sezon ka bërë shumë mirë. Çinari? Ndeshjet ndaj ekipeve të vendlindjes janë pak të sikletshme, por e kam kaluar tani këtë pjesë. Jam në një moshë që thjesht e shijoj.”
Titulli- “Patjetër që e pretendojmë titullin përderisa matematika na e lejon. Kemi edhe Kupën dhe kemi shans akoma më të mirë se kampionati për të marrë trofe. Na duket më e lehtë në Kupë, sepse kemi gjithçka në dorë. Mendoj se Partizani ka më shumë presion nesër. Ata janë ndërtuar për titullin kampion, kurse ne për Kupat e Europës. Tani përderisa erdhëm deri këtu, pse të mos e tentojmë. Gjithsesi, brenda objektivit jemi sepse me 99% Europa League-n e kemi siguruar”.
