“Qytetarët besojnë se janë të paprekshëm nëse i shërbejnë partisë”/ Braho: Të administrohen faktet që hedhin dritë mbi 25 prillin

Anëtari i KAS, Ledio Braho i ftuar në studion e RTV Ora u shpreh se Partia Demokratike ka depozituar kërkesën e tretë për qarkun e Vlorës e cila është refuzuar sërish.

Sipas Brahos, duhen administruar të gjitha provat të cilat hedhin dritë mbi procesin zgjedhor të 25 prillit.

Braho: “Kjo është kërkesa e tretë për prova që Partia Demokratike depoziton.

Ajo ka depozituar për qarkun e Beratit dhe qarkun e Gjirokastrës që janë rrëzuar dhe sot ishte për qarkun e Vlorës që sërish u rrëzua. Këto rrëzohen me shumicë votash nga anëtarët e KAS-it. Argumenti jonë ka qenë  ai i transparencës, ndërkohë që për 3 anëtarët e tjerë nuk kanë qenë të mjaftueshme pretendimet e PD.”

A po pengon KAS, sikurse tha përfaqësuesi i PD bërjen e transparencës për parregullsitë në votime?

Braho: “Vetë vota ime ka treguar që po pengohet transparenca. Në fund fare KAS mund të vendoste kundër pavlefshmërisë edhe duke i administruar këto prova, por që të bëhet një gjykim administrativ i gjithanshëm e mira është që të administrohen të gjitha provat e mundshme, ët cilat hedhin dritë mbi procesin.”

Jemi në kushtet që KAS nuk po merr të gjitha provat, sidomos nga SPAK, po i refuzon ato?

Braho: “Janë diku të 18 kërkesa që PD  bën për çdo qark. Që të mohosh të drejtën për të kërkuar prova, për mendimin tim nuk është e drejtë. Rasti i Gjirokastrës duhet të ketë një vendimmarrje më të shpejtë sepse pritet vetëm që të sqarohet raporti nga identifikimi biometrik. Ndërkohë për qarkun e Beratit proceduara do të zgjasë më tej sepse dje u bë nxjerrja e materialeve zgjedhore. Për Beratin ka dy kërkesa; një për pavlefshmëri dhe një kërkesë për rinumërim.”

Në gjykimin tuaj, në bazë të provave të paraqitura nga PD-ja, sa gjasa ka që të ketë pavlefshmëri?

Braho: “Këtë nuk mund ta them, do të shihen të gjitha provat. Është problem fakti që provat të cilat PD kërkon të merren nga organet e tjera shtetërore është refuzuar, por të paktën me provat që kemi do të bëjmë gjykimin e duhur. “

Për t’u ndalur te rasti i Beratit ku 19 persona kanë votuar 50 herë. Si shpjegohet një gjë e tillë?

Braho:Janë dy raste të dy komisionerëve që kanë votuar dy herë si në qarkun e Beratit ashtu dhe në Gjirokastër, sepse për këta është e provuar. Është e njëjta kartë identiteti që është përdorur në dy qendra votimi të ndryshme. Është e pafalshme që një komisioner të votojë dhe në qendrën e votimit ku është komisioner, dhe në qendrën e votimit ku është si zgjedhës. Sot nuk ka asnjë person të dënuar përsa i përket krimeve zgjedhore, po flas për persona në nivele të larta. Ndaj dhe qytetarët besojnë se partitë politike mund t’i garantojnë atë paprekshmërinë sepse duke i shërbyer partisë së tyre mendojnë se janë të paprekshëm”.