Komisioni hetimor, i ngritur nga Kuvendi me firmat e 49 deputetëve socialistë, do të presë deri të hënën, Presidentin Ilir Meta, për të dhënë shpjegimet e tij.
Kjo u bë e ditur nga kreu i komisionit, Alket Hyseni, i cili gjatë seancës së sotme, ku ishte programuar edhe dëgjesa me Presidentin Meta, tha se për shkak të agjendës së Kreut të Shtetit, Komisioni duke nisur nga dita e mërkurë, do të presë deri të hënën Presidentin, për ta dëgjuar.
“Presidenca ka ngritur disa pretendime lidhur me pabazueshmërinë ligjore të këtij komisioni hetimor, duke e lidhur me legjitimitetin e Kuvendit.
Presidenca ngre pretendime proceduriale lidhur me komunikimin e shkresave, pabazueshmërinë e tyre dhe ngre procedim procedurial për pamundësi në paraqitje pasi në të dyja rastet e ka pasur të pamundur të merrte pjesë pasi ka pasur aktivitete të tjera të paracaktuara si në rastin e samitit të mbajtur së fundmi. Secili nga anaëtarët mund të njihet me argumentet e deklaruara nga Presidenti.
Kjo dëgjesë e Presidentit të Republikës nuk do të bëhet sot. Unë mendoj që për të mundësuar dëgjesën e Presidentit, në funksion të transparencës dhe opinionit publik, për të respektuar edhe pretendimet e tij, edhe të drejtat e tij për t’u shprehur.
Propozoj t’i nisim një shkresë ku t”i themi se jemi të gatshëm t’a presim që nga dita e nesërme deri në të hënën. Le të zgjedhë një datë.
Jeni dakord ? Atëherë hedhim në votim propozimin tim. Ky afat ka lidhje edhe me afatin e veprimtarisë së Kuvendit, sepse e kemi të pamundur që përtej ditës së hënë të zhvillojmë veprimtarinë hetimore, duke pasur parasysh që ne duhet të mbyllim hetimet me provat e grumbulluara.
Mos u shqetësoni për kalendarin, e kemi miratuar vetë, e ndryshojmë prapë vetë”, tha Hyseni.
