Nga Boldnews.al
Ndërsa Ministri i Brendshëm Blendi Çuçi i veshur sportiv shëtiste nëpër Tiranë me miqtë e tij, titrat e televizioneve informative pulsonin për ekzekutime mafioze, zhdukje personash dhe trafik droge. Vetëm brenda një jave kanë ndodhur tre vrasje të bujshme, ku edhe ndarja është fort e frikshme në qytetet ku krismat e armëve janë kthyer në melodi rutinë për veshët e qytetarëve. Në Vlorë, në Elbasan dhe në Shkodër, zona që njihen si fuçi baruti, ka tre viktima dhe lajmërojnë se të tjera do të vijnë më pas.
Janë vrasje që u sugjerojnë “agjencive funerale” të shtojnë arkivolët dhe të bëhen gati për të riun e radhës që pritet të mbyllë sytë nga plumbat e kundërshtarëve. Në Vlorë, bash e në mesin e ditës dhe në sy të shumë qytetarëve u vra Bledar Birçaj, ndërsa ishte në automjet bashkë me një efektiv të antidrogës dhe kushëririn e tij. Vrasësit e ekzekutuan dhe u larguan pa asnjë shqetësim. Pa autor është ajo ngjarje dhe pa të tillë duket se do të jetë. Një ditë më pas, në Elbasan vritet në sy të bashkëshortes Ibrahim (Everest) Çaka. Edhe aty asnjë autor, madje një të dyshuar që e shoqëruan në komisariat nuk e kanë më. U iku nga duart dhe vetëm policia “e papolitizuar” e Elbasanit mund ti japë shpjegim sesi ndodh kjo…
Statistikë për ministrin Çuçi dhe kryepolicin Veliu që herë pas here për të treguar se “policia punon” shkon në vendet e ngjarjeve për të bërë paradën e radhës dhe kthehet në zyrën e tij pa një bilanc pozitiv, pasi autorët gjithnjë arrijnë të largohen në drejtimin e ditur…
Pa u tharë ende gjaku i dy viktimave në Elbasan dhe Vlorë, nuk kishte si të mungonte Shkodra. Në zonën e njohur si Livadhet, e cila është kthyer në vendin ku grupet rivale lajnë hesapet, gjendet i masakruar dhe i vrarë me disa plumba 32-vjeçari Endri Mustafa. Për këtë ngjarje policia ka shpallur në kërkim një person të dyshuar, por familjarët e viktimës e përjashtojnë mundësinë që ai që thotë policia të jetë ekzekutori. Këto janë vetëm disa ngjarje të thata kronike, po policia dhe drejtësia e re me emër të madh ku është?
Vetë ministri ofron spektakël para mediave duke u mburrur se nuk ka “burrë të lidhur me krimin apo biznesmen që ndërton pa leje ” që ti bjerë telefonit të ministrit për ti kërkuar favore. Po Çuçi ndryshe nga tre paraardhësit e tij në atë ministri, që janë larguar me turp dhe akuza për trafik droge ka gjetur një rrugë tjetër. Më mirë të tregojë paaftësi dhe të jetojë i qetë “si çun blloku”, duke siguruar edhe benefitet e të qenit ministër, sesa ta pësojë si tre parardhësit socialistë. Çuçi tashmë është me pushime, duke mos i dalë akoma dehja e fitores në Gjirokastër, ku e ktheu qarkun në një garnizon në shërbim të pushtetit.
Kur kthen kokën pas, ministri aktual sheh Saimir Tahirin që sot ka një dosje vandak nën akuzën e trafikut ndërkombëtar të drogës në kuadër të grupit të strukturuar kriminal. Pasuesi i Tahirit, e pësoi pothuajse në të njëjtën mënyrë, pasi vetë tentoi të shfaqej si i pastër, por i vëllai me të shkuar të errët me të “bardhën drogë”, bënte kapon në Vlorë, duke u dyshuar për trafik hashashi. I fundit që i zuri vendin Çuçi mbetet një person emblematik si Sandër Lleshaj, i cili do të mbahet mend gjatë, shumë gjatë, si njeriu që zbrazi qindra bomba me gaz lotsjellës mbi qytetarët dhe u detyrua të largohej me një barrë turpi, pas vrasjes nga policia të 25-vjeçarit Klodjan Rrasha.
E shkuara është aty, ndaj Çuçi ka zgjedhur të bëjë jetë të qetë, qoftë edhe atëherë kur ikin jetë. Pas atyre plumbave ka një të vërtetë të madhe, se krimi i organizuar i ka shtrirë rrënjët aq thellë sa ka kapur elitën e policisë dhe të politikës në pushtet, duke siguruar për veten “pushtetin e kallashinikovëve”.
