Propaganda/ Edi Rama, 200 mijë euro të tjera që të japë show në “televizor”

Nga Boldnews.al

Shpenzimet e luksit nuk kanë të mbaruar në zyrat e shtetit. Dy kampionët janë “shefi i madh” (Edi Rama) dhe “shefi i vogël” (Erion Veliaj). i pari ka bërë televizion privat, ERTV, duke transmetuar në rrjete sociale dhe youtube. i dyti, e ka shndërruar zyrën e medias në Bashkinë e Tiranës me një staf që do e kishte zili edhe një televizion kombëtar. Të dy, kanë punësuar dhjetëra persona, nga kameramanë montazhierë, gazetarë, redaktorë, etj, etj. Por, pagat dhe shpenzimet nuk mbulohen nga xhepat e tyre, por nga xhepat e shpuar të qytetarëve shqiptarë. BoldNews ka publikuar dhjetëra investigime për këto shpenzime, që në këto kohë të veshtira konsiderohen luksi. Megjithatë, këto shpenzime nuk janë ndalur asnjëherë, por sa vijnë e shtohen, duke i shndërruar këto zyra shtypi në makineri propagande. Për të dalë mirë në “televizor”, “shefat” e këtij shteti të varfër harxhojnë qindra mijëra euro.

Sipas dokumenteve që ka siguruar redaksia e Boldnews, disa ditë më parë është shpallur fituesi i tenderit me objekt “mirëmbajtje e sistemit të interpelancave në Kryeministri”. Kohezgjatja e kontratës është 24 muaj, ndërsa në tender kanë marrë pjesë 3 kompani. Fitues ka dalë kompania “Infosoft Systems” me ofertë 15.455.376 lekë pa tvsh. Ose mbi 150 mijë euro me TVSH. Në dokumentet shoqëruese shkruhet se kërkohet që të mirëmbahet sistemi i video konferencës, i cili është një sistem i cili është implementuar dhe hostuar pjesërisht pranë ambjenteve të një institucioni shtetëror dhe pjesërisht pranë ambjenteve të Këshillit të Ministrave. “Ky sistem përdoret nga Këshilli i Ministrave për realizimin e Video Konferencave midis zyrës së Kryeministrit dhe Ministrive apo përfaqësues të jashtëm. Këta përfaqësues të jashtëm mund të jenë si nga Pushteti Qëndror ashtu dhe nga ai Vendor, apo dhe nga Biznesi” thuhet në këto dokumente. Pra, nga videot tipike në ERTV, ku Rama shkon nëpër institucione të ndryshme dhe bën ecejaket e tij.

Në të njëjtën kohë, është bërë një tjetër tender për shpenzimet e luksit të Edi Ramës. Kësaj here është bërë tender me objekt “mirëmbajtje për sistemin e konsultimit publik” për Këshillin e Ministrave. Fondi për këtë tender është 2,616,000 lekë pa TVSH.
Pra, të dy tenderat janë për mirëmbajtje. Duket se fushata dhe zgjedhjet e 25 prillit i kanë “konsumuar” këto sisteme, ndërsa shqiptarët do të paguajnë për të dy tenderat rreth 200 mijë euro. Dhe, këto shpenzime vetëm që kryeministri jonë të dalë sa më mirë në televizor.