Nga BoldNews.al
Kryeministri Edi Rama deklaroi mesditën e së Premtes se “Policia e Shtetit shfarosi fenomenin e kultivimit masiv të lëndës narkotike në të gjithë territorin”, gjatë një aktiviteti ku sugjeroi masa shtesë për paligjshmërinë në përgjithësi në vend.
Deklarata pompoze e kryeministrit është shumë larg realitetit dhe shifrave të publikuara nga agjencitë e zbatimit të ligjit.
Prokurori i Përgjithshëm, Olsian Çela, në raportin mbi Gjendjen e Kriminalitetit për vitin 2020, konstaton se kultivimi i lëndëve narkotike është rritur 40 përqind, krahasuar me një vit më parë.
Pra, për Prokurorinë Shqiptare, jo vetëm që nuk bëhet fjalë për shfarosje, por, për më tepër, ka shënuar rritje të ndjeshme.
Në vitin 2020, “nga të dhënat statistikore, vërehet tendenca në rritje prej 40.92 përqind e procedimeve të regjistruara për këtë vepër penale (kultivim narkotikësh), krahasuar me vitin 2019”, shkruhet në raportin e Prokurorit të Përgjithshëm.
Pra, duket qartë se kryeministri Rama po mundohet të fshehë realitetin, nëpërmjet takimeve butaforike, në të cilat mbledhin drejtuesit e lartë të Policisë dhe bëjnë sikur u “kërcasin dhëmbët” për forcimin e kontrollit në territor.
Qeveria e “Rilindjes” nuk ka pasur asnjëherë raporte të mira me luftën kundër kanabizimit të vendit.
Në vitin 2014, një operacion i bujshëm policor theu “mitin” e Lazaratit, një fshat në periferinë jugore të vendit që ishte shndërruar simbol të kultivimit të lëndës narkotike.
Por, pas këtij operacioni, Policia Shqiptare toleroi përhapjen e parcelave me drogë nga cepi në cep të Shqipërisë.
Në periudhën 2015-2017, mijëra hektarë nga Tropoja në Sarandë u lulëzuan me bimën e ndaluar, ndërkohë që tonelata droge u dyndën në brigjet e Italisë dhe në vendet e tjera fqinje, përfshirë Greqinë.
Kanabizimi i vendit u krye me “leje të posaçme” të drejtuesve të lartë të policisë, një pjesë e të cilëve u arrestuan apo u hetuan për bashkëpunim me trafikantët.
Pas një rënie të kultivimit në periudhën 2018-2019, për shkak të mbingopjes së tregut, fenomeni i kanabizimit është rikthyer sërish në vitin 2020, një vit para zgjedhjeve të përgjithshme, nga të cilat Rama siguroi mandatin e tretë nëpërmjet “masakrës elektorale” të blerjes së votave, siç akuzohet zyrtarisht nga opozita.
